Reakshon di polis riba publikashon inkorekto.

KOMUNIKADO DI PRENSA
352 / 2019
5 sèptèmber 2019
Reakshon di polis riba publikashon inkorekto.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Relashoná ku informashonnan no korekto ku a bini den publisidat tokante di tardansa di
unidatnan polisial pa a yega na e kaso di hinkamentu ku a tuma lugá djárason último den
Mampurituweg, ta nesesario pa pone algun aspekto den nan konteksto korekto.
A base di investigashon i análisis ku polis a hasi, niun momentu so, a dura 45 minüt of mas,
promé ku polis a yega na e sitio di e insidente.
Den apénas 10 minüt despues ku e yamada a drenta na Sentral di Polis, e promé unidat a
yega na e sitio i tabata reportá na Sentral di e insidente.
E 10 minüt aki, ketu bai ta denter di e márgen ku unidatnan mester yega na sitionan di
insidente ku tin prioridat haltu.
Polis tin tur komprenshon ku pa un hende den ansha, kada minüt ta parse manera un ora i
komo kuerpo, nos ta sòru semper pa kasonan di prioridat haltu, keda atendé
inmediatamente, sigur ora ta trata bida òf propiedat di hende ku ta na peliger.
Kuerpo Polisial ta lamentá ku un morto mester a kai un bia mas a konsekuensia di un
krímen. Pasobra pa nos, kada unu ta di mas.
Pero bou di ningun sirkunstansia ta aseptabel ku ta pone Kuerpo Polisial responsabel pa e
kaso aki, tresiendo informashon inkorekto, den e sentido ku ta pa motibu ku polis a tarda di
yega na e sitio, no por a evitá e asesinato aki.
Polis tin hopi reto, pero semper nos meta prinsipal ta pa duna un servisio di kalidat, duna
protekshon i huntu ku komunidat yuda kombatí kriminalidat.
I nos lo sigui hasi esaki tur dia ku e mesun determinashon.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: