Prome Minister Evelyn Wever-Croes: Encuentro di dos dia entre Gobierno di Aruba y stakeholders DIMP, Aduana y DWJZ: CU REFORMA FISCAL ARUBA LO YEGA NA UN FINANSA PUBLICO DURADERO Y SALUDABEL
Prome Minister Evelyn Wever-Croes:
Encuentro di dos dia entre Gobierno di Aruba y stakeholders DIMP, Aduana y DWJZ:
CU REFORMA FISCAL ARUBA LO YEGA NA UN FINANSA PUBLICO DURADERO Y SALUDABEL
Na Renaissaince Conference Center, diaranson y diahuebs a tuma luga un encuentro entre Gobierno di Aruba y stakeholders DIMP, Aduana y DWJZ riba Reforma Fiscal. Prome Minister y Minister di Finansa y Asuntonan Economico tawata presente na e encuentro importante aki. Esaki ta e prome encuentro di e indole aki despues di hopi aña. Tanto Gobierno como e stakeholders a comparti informacion y sugerencianan. Despues di e encuentronan, Gobierno lo evalua tur sugerencia y opinion cu a wordo treci dilanti cu lo yuda tambe pa fiha e rumbo cu Aruba mester bay pa yega na un finansa publico duradero y saludabel.
Segun Prome Minister Evelyn Wever-Croes, no ta algo desconoci cu nos sistema di impuesto ta bastante anticua, y no a mira reforma substancial pa modernisa e leynan di impuesto. E ultimo esfuerso serio cu nos a mira di reforma den nos impuestonan directo tabata na 2003/2004 den cuadro di ‘Nieuw Fiscaal Raamwerk’, modernisacion di AVV, etc. Esey tabata 15 aña pasa! Pa loke ta e impuestonan indirecto, e ultimo esfuerso serio tabata na 2007, momento di a introduci e BBO y mes momento a baha varios tarifa di importacion y elimina categorianan den e tarifa. Esey ta 12 aña pasa. “Gabinete Wever-Croes ta determina pa trece e cambio husto awor si”, Prome Minsiter a enfatisa!
Gabinete Wever-Croes encontra un situacion financiero hopi serio for di e gobierno anterior. Un debe cu a wordo redobla den 5 aña for di un GDP na 2009 di 45% te casi 90%. Deficitnan gigantesco durante e añanan aki a yega te 400 miyon florin. Cu ciere di Refineria desempleo a aumenta. Na añanan 2015 y 2016, nos economia a stagna y nos a experencia falta di crecemento economico.
Otro reto encontra ta e relacion malo entre Aruba y Hulanda, unda cu Hulanda a perde confiansa den palabra di e gobierno di Aruba. Esaki a reta Gobierno tambe pa traha mas duro pa drecha e situacion financiero di nos pais. A cuminsa baha e gastonan di ministerionan cu un total di 20 miyon na 2018. Tambe a baha e personal cu ta traha na e bureaunan di ministernan compara cu añanan anterior.
E deficit pa aña 2018 tawata na 149 miyon florin. Pa e aña aki, 2019, e deficit ta na 25 miyon florin. Y pa aña 2020, ta proyecta pa yega un surplus di 25 miyon florin, cu lo ta e prome biaha cu pais Aruba desde 2008 lo conoce un surplus. Pa aña 2021, nos mester yega na un surplus di 50 miyon florin cu ta ekivalente na 1% di nos GDP. Esaki ta e palabracionnan nobo haci cu Hulanda na november ultimo.
Apesar di ta enfrentando retonan grandi, Gobierno di Aruba a tuma e decision pa reforma nos sistema di impuesto, pa crea un sistema di impuesto mas husto y mas eficiente cu lo genera desaroyo economico pa Aruba. Teniendo cuenta cu e trabou pa reforma e sistema di impuesto ta hopi grandi, a dicidi pa haci esaki den 4 fase. Haciendo asina, lo trece miho resultado y un miho producto.
E prome fase di Reforma Fiscal a wordo ehecuta entrante 1 januari 2019, cu cambionan den tarifa di inkomsten- y loonbelasting, tarifa grondbelasting, belasting riba dividend, y accijns riba alcohol y sigaria, mirando e efecto dañino cu esaki tin riba salud.
Den e di dos fase a concentra mas riba e accijns y invoerrechten y e BBO. E di dos fase ta proyecta pa wordo finalisa prome cu fin di e aña aki.
Den e di tres fase nos lo concentra riba proposicionnan pa simplifica inkomstenbelasting y winstbelasting. E di tres fase lo wordo finalisa mas tarda den di dos mita di aña 2020, cu e posibilidad pa implementa algun cambionan mas prome.
Den e ultimo fase lo pone atencion riba e diferente impuestonan cu turistanan ta paga. Pa e fase aki tambe lo conta cu sugerencianan y opinionnan di stakeholders y e encuentro pa brainstorm riba esaki lo tuma luga den comienso di 2020.
“Gabinete Wever-Croes su meta principal ta pa pone e ser humano central. Pa hopi tempo, pueblo a wordo laga atras. Nos tarea grandi ta pa pone Aruba bek den e bon rumbo pa yega na finansas publico saludabel. Reforma Fiscal ta e Sistema husto cu lo garantisa progreso economico. E retonan ta grandi, pero cu boluntad y perseverancia di Gabinete Wever-Croes y di tur stakeholders, nos lo logra e proposito di trece un e cambio husto den nos sistema di Impuesto”, Prome Minister Evelyn Wever-Croes a duna di conoce.
