Petishon pa ferlòf pa tripulashon di Ms. Zeeland na Boneiru a keda aprobá
Petishon pa ferlòf pa tripulashon di Ms. Zeeland na Boneiru a keda aprobá
Tripulashon di e barku MS Zeeland a entregá un petishon pa nan pasa nan ferlòf na Boneiru. E 70 miembronan di tripulashon a pasa basta dia kaba riba laman i nan lo apresiá si nan lo por pasa nan ferlòf, kual ta konsistí di tres dia liber, na Boneiru. A yega di hasi e petishon aki mas biaha i normalmente ta akordá esaki semper. Sinembargo pa motibu di e medidanan relashoná ku e virùs di Corona, e biaha aki e Tim Insular di Maneho (Eilandelijk Beleidsteam – EBT) mester a evaluá e petishon.
Den konsulta ku EBT, e Servisio di Salubridat Públiko i e komandante di Ms. Zeeland a evaluá e situashon di e militarnan i a pisa i diskutí tur e kondishonnan. A disidí ku ta pèrmití e miembronan di e tripulashon di baha for di e barku pa nan por disfrutá di 16 pa 19 di mei di nan ferlòf na Boneiru.
Sinembargo e ferlòf ta solamente permití bou di sierto kondishon. Asina nan no ta pèrmití di aglomerá den kantidat grandi, esta mas ku 10 persona. Di e forma aki ta keda posibel pa e habitantenan di Boneiru por bishitá establesimentunan di horeca, sin surpasá e kantidat di 50 persona máksimo ku a keda palabrá i ta rekerí pa entregá un deklarashon di salú. Mirando e sirkunstansianan ku e militarnan tabata den dje riba laman, quarantaine riba e isla no ta rekerí.
E petishon pa ferlòf ta kai pareu ku e vishon di maneho di EBT pa suavisá e medidanan den fase. Boneiru awor aki ta den e fase den kua koutelosamente i paso pa paso ta suavisando e medidanan. Permití ferlòf di e militarnan di Ms. Zeeland ta un di e pasonan aki.
