Spich Gezaghebber 15 mei 2020

Awe 15 di mei ta dia internashonal di famia. Na 1993 Asamblea General di Nashonnan Uní a proklamá e fecha akí komo un dia di reflekshon riba importansia ku mundu kompleto ta duna na e ròl di famia den komunidat. Awor mas ku nunka nos ta mira e importansia pa den famia tin union, amor, pas, toleransia i sosten.

Awe tambe ta dia ku un ordenansa di lei di emergensia nobo ta drenta na vigor. Atrobe a suavisá algun medida, pero esei no ta kita e responsabilidat ku kada siudadano tin pa tene su mes di forma estrikto na e reglanan di higiena i di distansia sosial. E reglanan ku a suavisá ta:

Klup nokturno, sauna, spa, i pisina pa públiko por habri atrobe bou di kondishonnan estrikto.

Kompetensia di deporte ainda ta prohibí. Na Pachi’s Place ta e bar so ta habrí atrobe. Ta prohibí ainda pa tene evenemento ku ta rekerí pèrmit. E regla di distansia sosial di por lo ménos 1.5 meter, no mas ku 50 hende huntu na un sitio i e reglanan di higiena ta keda vigente den e ordenansa di lei nobo akí tambe.

Mi ke bolbe enfatisá ku si resultá ku e vírùs ta aktivo atrobe na nos isla, por bai tuma medida mas estrikto ku lo tin efekto riba nos forma di biba.

Mi ta pasa pa un otro tema. Mi a haña petishon di Defensa pa e barku militar MS. Zeeland bishitá Boneiru for di mayan te ku 19 di mei. Ta trata un tripulashon di 70 persona ku ya a pasa basta tempu riba laman, pues karentena no ta nesesario. Nan petishon ta pa ta na Boneiru pa 3 dia liber i a honra e petishon akí. A pone kondishonnan estrikto sí ku e tripulashon mester kumpli kuné pa nan por baha di e barku. Por ehèmpel nan no mag di bai mas ku 10 hende huntu na un sitio. I asina tin vários regla mas ku nan mester kumpli kuné.

Na momentu ku e barku yega djasabra mainta Chris de Vogel, representante di kolòm di kuido médiko lo subi abordo di e barku pa splika e tripulashon ta ki ta e regla i kondishonnan. Nan ta konta pa tir miembro di tripulashon. E petishon di defensa akí ta pas den e maneho di Tim di Maneho Insular, Eilandelijk Beleids Team (EBT). E tim a konsehá pa suavisá e medidanan di emergensia tiki tiki.

Aki ratu komunidat ta sera konosí ku Chris de Vogel. Chris de Vogel tabata resientemente manager di programa di COVID-19 di Geneeskundige Hulpverlenings Organisatie in de Regio, GHOR na Haaglanden. El a bini Boneiru pa yuda nos despues ku e tabata den karentena obligatorio pa 2 siman. De Vogel a kuminsá e siman akí komo manager di krísis pa kolòm di salubridat i kuido médiko i ta konsehero di e kolòm aki den EBT.

E tin un un trayektoria hopi largu riba tereno di maneho di krísis i den salubridat públiko. Na vários okashon e tabata na Boneiru pa duna sosten na nos servisio di salubridat públiko. Pues e no ta un deskonosí pa Boneiru. Awe e lo duna mas informashon riba e último desaroyonan den e sektor akí. Na nòmber di nos tur mi ke yama Chris de Vogel gustosamente Bon Bini, éksito ku e trabou!