Prome Minister Evelyn Wever-Croes:  RESUMEN DI SIMAN DI GABINETE WEVER-CROES 1-7 september 2019

Prome Minister Evelyn Wever-Croes: 

 

RESUMEN DI SIMAN DI GABINETE WEVER-CROES 1-7 september 2019

 

Premier Evelyn Wever-Croes a felicita y gradici prensa riba Dia Di Prensa. Libertad di expresion ta un derecho fundamental di cada ser humano. E libertad aki ta trece cu n’e un responsabilidad grandi. Abusa di e libertad aki por causa cu nos ta perd’e, y esey nos no kier pa socede. Nos cada un mester defende y cuida e libertad aki, door di aplik’e cu cautela, door di aplik’e cu respet den bienestar di informa nos comunidad.

 

Premier Evelyn Wever-Croes a representa Minister Glenbert Croes na e Bariofest na Centro di Bario Brazil. Esaki ta e di 4 Bariofest cu a tuma luga rond di Aruba y cada biaha e ta crece mas. Den nomber di Minister Glenbert F Croes, Premier a entrega certificadonan di reconocemento na baluartenan di Brazil. Na final, Aruba por a gosa di un bunita parada cultural colorido y yen di ambiente den bario di Brazil.

 

Premier Evelyn Wever-Croes y Minister di Finansa Xiomara Ruiz Maduro a organisa e prome encuentro cu gremionan tocante Reforma Fiscal, un encuentro historico. Nos sa cu nos sistema di impuesto ta bastante anticua, y no a mira reforma substancial pa modernisa e leynan di impuesto. E ultimo esfuerso serio cu nos a mira di reforma fiscal tabata 12 aña pasa! Na final di e dos dianan di encuentro Premier Wever-Croes a gradici tur gremio pa nan contribucion. A base di esaki lo fiha cual ta e caminda cu lo sigui. Gabinete Wever-Croes ta determina pa trece e cambio husto.

 

Premier Evelyn Wever-Croes den nomber di Gobierno di Aruba a manda condolencia y mensahe di convivencia pa e Prome Minister di Bahamas sr. Hubert Minnis. Orcan Dorian tabata devastador pa un gran parti di Bahamas, nos oracion y pensamento ta cu e pueblo di Bahamas y especialmente esnan cu a perse familiar y pertenencianan. 

 

Premier Evelyn Wever-Croes Diaranson anochi a tene un sesion special pa yuda ciudadanonan di San Nicolas cu varios asunto, incluyendo tambe yenamento di nan documentonan di impuesto. Hopi hende a acudi na oficina di gobierno ‘Edison Briesen’ unda cu premier a yuda nan. Corda, paga impuesto ta un deber di nos tur, pero no paga dimas impuesto!

 

Premier Evelyn Wever-Croes a ricibi bishita di cortesia di GM di Aruba Marriott Resort señora  Karen Chastain na unda cu a intercambia riba varios topico importante pa Aruba. 

 

Gobierno y sindicato ta sigui delibera riba e tema di indexering y bashi premie/gelijk bedrag. Ambos topico ta topiconan di prioridad pa Gabinete Wever-Croes. Sinembargo nos mester realisa cu e espacio financiero pa cumpli cu esakinan no tey. Talves esaki ta e desafio mas grandi. A keda palabra cu Gobierno y sindicatonan lo sigui den deliberacion 

 

E crisis di Venezuela tin un impacto hopi grandi riba Aruba. Hulanda y Aruba a yega na acuerdo cu Hulanda lo yuda Aruba cu 10.9 miyon florin. Esaki NO ta un fiansa y nos NO mester pag’e bek. E placa aki ta pa inverti na Aruba den fortifica nos fronteranan y mantene nos isla mas sigur. Un ayudo importante pa Aruba. 

 

Diadomingo Minister Bikker compaña pa su famia a bishita e celebracion social-cultural ‘BarioFest’ na Centro di Bario Brazil. Ministerio di Husticia a participa na e evento unda tabata presente Cuerpo Policial, Kustwacht y Cuerpo di Bombero. Grandi y chikito por a mira di cerca y saca potret di e Helicopter di KPA, Metal Shark di Kustwacht, Truck y ekiponan di Brandweer, Mobile Command Center di Polis y e brommernan nobo di Polis. 

 

Dialuna Minister Bikker tabata den conferencia di prensa di Gobierno unda ela elabora riba e extra medida di siguridad cu a pone pa reenforsa KIA, introduccion di cambionan den ley pa tratamento obligatorio ambulante (‘voorwaardelijke machtiging’), E-Governance, castigo mas severo pa esnan cu bay yuda prisonero pa purba scapa, y varios otro update di leynan cu den concepto di Minister Bikker ta anticua. 

 

Dialuna den oranan di merdia, Minister Bikker a bay KIA pa mira e trabounan cu a haci den e ultimo simannan pa reenforsa siguridad na e Institucion. Pa e trabou riba e infrastructura a pone un team special di DOW y cu ayudo di un contratista a traha pa simanan largo 7 dia pa siman pa caba cu e trabou. Parti di e medidanan di siguridad tabata pa pone luz permanente ful rond di e compleho y asina awor tin hopi mas iluminacion. KPA a staciona e Mobile Command Center cu su camaranan sofistica y a pone patruyanan extra di tanto Polis y di CEA. Cu ayudo di e Militarnan conhuntamente cu trahadonan di KIA a pone mil meter di prikkeldraad rond di KIA pa dificulta un eventual huida.

 

Dialuna tardi Minister Bikker hunto cu representantenan di DRH a reuni cu trahadonan di Guarda nos Costa. Den e reunion a trata temanan manera Formatieplan, renobacion di edificionan di GNC y cierto material di trabou cu ta pendiente cu nan mester haya. Minister Bikker a expresa di tin comprencion pa diferente peticionnan, a recorda cu den apenas 18 luna di gobernacion, e Departamento a haya hopi material di trabou compara cu e 8 aña anterior y a pidi pa tin poco pasenshi mirando e retonan financiero cu a hereda. 

 

Siman pasa Minister Otmar Oduber a elabora entre otro riba e condicionnan adicional cu a inclui, mediante un decreto ministerial (MB), pa asina evita traspaso di terenonan na un tercer persona sin e autorisacion necesario. Den e decreto ministerial aki, tin 3 punto specifico sumamente importante cu mester wordo tuma den consideracion. Cu esaki ta spera di cera e buraco cu tin den e maneho y para e fenomeno di negoshi cu terenonan di Aruba.

 

Riba invitacion y gasto di AM Resorts y Grupo Martinòn, cu ta e desaroyadornan y operadornan di Secrets Baby Beach Aruba, un grupo di prensa a sali rumbo pa Punta Cana, pa asina conoce e facilidadnan como tambe e operacion di nan cinco hotelnan na Punta Cana. Tur esaki, na vispera di inicio di construccion di e propiedad na San Nicolas y ta pa informa comunidad di Aruba kico nos por spera ora cu e Hotel Secrets wordo construi na Aruba y nan drenta den operacion.

 

Diamars mainta a tuma luga un encuentro entre Minister di Infrastructura, Desaroyo Teritorial y Medio Ambiente, Otmar Oduber y ex Minister di Transporte y Telecomunicacion, Benny Nisbet. Durante e encuentro ameno aki, a toca temanan actual di desaroyo tumando luga na San Nicolas como tambe e construccion di e hotel Secrets Baby Beach Aruba, cual proximamente lo inicia su construccion na Sero Colorado.

 

Gobierno a gana e caso cu Aruba Birdlife Conservation (ABC) a entama contra pais Aruba y kier a demanda 1.250.000  florin for di placa di pueblo. Cu e demanda y e suma menciona Aruba Birdlife Conservation (ABC) ta contradiciendo su propio meta pa pone bienestar di nos medio ambiente na prome luga. Ta trata aki di un caso cu ta regarda e tereno pariba di Azure, pa cual a acusa Gobierno di no ta protega esaki debidamente. E acusacion aki ta uno no funda y Pais Aruba a haya rason conforme veredicto di hues. 

 

Recientemente e compania Prime View a entama un caso contra Pais Aruba di cual hues a duna e veredicto 4 di september. Ta trata di un intencion di un proyecto cu tin basta aña andando, na unda e compania a lanta un caso contra Pais Aruba pa motibo cu e no a ricibi un otro extension pa su opcion di por construi un hotel den area di Palm Beach. Den e caso aki, hues ta hopi categorico riba e rekisitonan cu e compania no por cumpli cu n’e ya pa añanan, como tambe e maneho di moratorio anuncia mediante e asina jama “voorbereidings besluit, presenta na december 2018 pa Minister di Infrastructura.

 

Un otro proyecto cu ta den ehecucion ta esun di e FACT-team Kinder- en Jeugdzorg. E ta un ekipo specialisa den yuda hobennan cu problema psikiatrico cu tin mester di atencion mas frecuente. A aloca e fondonan necesario y asina a logra haya e profesionalnan cu tabata tin mester. Aki a haya entre otro un psikiatra, dos psicologo di mucha y tres enfermera specialisa den psikiatria. 

 

Cu e mesun enfoke riba e hobennan, pa loke ta e parti preventivo a yega na un cooperacion hunto cu FADA pa loke ta e proyecto B-SMART. E personal di FADA a ricibi training di Mental Health Caribbean pa asina nan por ta bon prepara pa duna presentacion na scolnan. En total tin 7 scol cu ta participa na e proyecto, unda lo papia riba topiconan cu por afecta e hobennan di forma psicologico y/of social. E prome scol lo inicia dia 9 di september binidero.

 

Minister Dangui Oduber a haci un site visit na Hyatt Place Airport Aruba. Un bunita proyecto pa Aruba. Reservacionnan ta wordo tuma desde november 1 y desde october 16 e staff lo ta cuminsa nan training intensivo pa duna servicio di calidad na tur huesped. Ta trata di un Inversion di $50 Million y Gobierno ta hopi contento di mira un GM Arubiano eynan. Minister Dangui Oduber a Gradici Sra. Raven y inversionistanan pa kere den e economia di Aruba y ta deseanan hopi exito.

 

Minister Dangui Oduber tawata tey presente na e despedida di Sr Gerrit Griffith como GM di Divi Phoenix. Despues di un carrera impresionante di 43 aña den e industria turistico awe oficialmente sr. Griffith ta bay cu pensioen bon mereci.

 

Den nomber di Gobierno di Aruba a gradici sr. Griffith pa tur su añanan den servicio y ta dese’e tur clase di exito. Na mes momento Divi a nombra 2 Arubiano como Gerente General cu ta sra. Pearl Lake y Sr. Ferrie Zievinger. Sigur un bon ehempel pa otro hotelnan pa nombra Arubianonan como GM. Exito na ambos.

 

Minister Ruiz-Maduro tabata presente na e Parada Cultural en conexion cu celebracion di Dia di Brazil. E mandatario a gosa di un bunita parada den cual a tuma parti varios grupo di mucha, hoben y adulto y tambe un grupo di Corsou den bunita trahenan di folkor. E gruponan a wordo anima door di varios tipico cu a trece un ambiente netamente cultural. Minister di Cultura a felicita e organisadornan Fundacion Chico Harms, Centro di Bario Brazil, Comision Eleccion y Parada Cultural cu a organisa ya pa 9 aña un bunita Parada Cultural. Tambe e mandatario a yama un danki na tur e gruponan, participantenan y bandanan pa nan contribuccion pa asina nos pueblo por a disfruta di un bunita parada cu un dushi ambiente durante cual e publico a biba nos cultura. 

 

Durante e conferencia di prensa semanal Minister Ruiz-Maduro a brinda informacion y splicacion riba e reaccion di e organo di supervision financiero CAFT riba e cifranan di e di dos kwartaal di ehecucion di Presupuesto 2019. E mandatario a informa cu Gobierno a ricibi un evaluacion positivo di CAFT. Gobierno ta realisando e entradanan manera premira y ta conteniendo su gastonan kedando den e cuadro financiero. CAFT den su reaccion a pidi Gobierno atencion pa algun asunto cu ta forma un risico, manera gastonan di AZV y ehecucion di e di dos fase di Reforma Fiscal. Tambe CAFT ta di opinion cu Aruba no ta cumpli cu e norma di gastonan di personal door cu no a inclui e gastonan di personal di e Social Crisis Plan den e gastonan di personal di 479 miyon riba e presupuesto. E mandatario a splica cu Gobierno di Aruba tin un diferencia di opinion cu CAFT tocante di esaki y actualmente Pais Aruba y Hulanda ta den deliberacion con pa soluciona esaki. E documento di CAFT ta uno positivo y Pais Aruba a ricibi un bon evaluacion di CAFT. 

 

Diaranson y diahuebs parti mainta a tuma luga e reunionnan cu diferente ‘stakeholders’ pa asina Gobierno por a brinda informacion tocante e cambionan proponi pa e segundo fase di e Reforma Fiscal. Alabes Gobierno a scucha e opinionnan y preocupacion di diferente ‘stakeholder’. E tabata un encuentro fructifero durante cual Gobierno a ricibi varios sugerencia y lo evalua esakinan pa yega na un Reforma Fiscal husto na beneficio di nos ciudadonan. Minister Ruiz-Maduro a gradici tur ‘stakeholders’ pa nan contribucion, tambe a yama danki na e expertonan di Departamento di Impuesto, Aduana y Departamento di Legislacion pa nan tremendo cooperacion. 

 

E sector di Agricultura ta un di e sectornan prometedor pa diversificacion di nos economia. Den cuadro di esaki Minister di Economia a reuni cu United Farmers Aruba (U.F.A) pa asina atende nan preguntanan y brinda splicacion riba e incentivanan fiscal cu tin pa e sector y e otro incentivanan cu Gobierno ta trahando riba nan pa asina por facilita y incentiva e sector prometedor aki. E mandatario a informa U.F.A. cu Gobierno pronto lo tene un session informativo pa tur agricultor.

 

Minister di Finansa a reuni e siman aki cu e sindicatonan pa trata e tema di indexering. Pronto e grupo di trabou cu ta consisti di representante di sindicato y di Gobierno lo reuni pa asina bin cu propuesta concreto di cual ta e manera mas factibel pa por yega na un compensacion pa e perdida di poder di compra. E mandatario a reuni tambe apart cu sindicato TOPA riba e topico di pensioen di empleado publico. 

 

Kedando den contacto cu comercio, e siman aki Minister Maduro a reuni cu Arubaanse Optiek en Optometrie Vereniging, cu Total Finance y cu Deloitte pa asina atende nan preocupacionnan y bay hunto en busca di posibel solucion pa yuda comercio na Aruba.

 

Banco Central di Aruba a organisa un simposio ‘Fostering Economic Resilience in Small Islands States’ diabierna ultimo durante cual Minister Ruiz Maduro a hiba palabra como orador invita. E dignatario a elabora riba e ‘Maneho Economico 2019-2022. Un economia fuerte y resiliente’ cu Gobierno a publica na april e aña aki. Alabes e mandatario a brinda informacion riba kico tur Aruba ta haciendo riba e tereno di resiliencia economico. Minister Ruiz-Maduro a bisa cu Gobierno tin su retonan, pero tin cambionan tambe cu ta mas grandi cu e retonan. ‘Hunto nos por atende cu e retonan structural den nos economia y mercado laboral, aumenta e productividad laboral competitivo sostenibel di Aruba su economia’. E mandatario ta convenci cu eventonan manera e simposio aki ta reinforsa nos esfuerso pa avansa conhuntamente. Minister Ruiz-Maduro a gradici CBA pa nan colaboracion pa a organisa e simposio y elabora riba e tema di resiliencia economico.

 

Manera cu Minister Glenbert Croes a yega Aruba despues di su biahe informativo na Hulanda, e prome tema cu e mandatario a atende ta Tra’i Merdia. Un departamento di Gobierno cu ta ofrece un solucion pa mayornan cu ta traha y cu na mes momento ta tene nos muchanan for di riba caya. Tra’i Merdia ta existi 23 aña, tin 1000 mucha inscribi cu un lista di espera di 346 mucha. E ta un arma poderoso den cuido, proteccion y guia di nos muchanan.

 

Habriendo diamars, Ministerio di Asunto Social y Labor a organisa un mainta di mariachi pa nos hendenan special di Fundacion Biba Bou Guia. Mariachi Nacional a deleita nos hendenan cu e musica cu nan ta gusta. Chihuahua Grill a ofrece na tur presente e famoso Fajita. DJ Alvin kende semper ta coopera, a deleita cu variedad di musica. Minister Glenbert Croes a gradici tur cu a contribui na haci e mainta aki un exito total. Un danki special na Sr. Griffith kende a bira un aliado importante den nos lucha social hunto cu Darlaine cu Rochi kendenan ta e motornan tras di tur e eventonan social di Ministerio.

 

Despues a sigui atende asuntonan di personal y financiero cu Tra’i Merdia, inventarisando kico tin prioridad pa Tra’i Merdia por sigui funciona. Escases di personal ta perhudicando Tra’i Merdia na e momentonan aki, poniendo presion hopi grandi riba e Lidernan cu ta trahando. Pero e boluntad t’ey pa yega na solucionnan structural.

 

Minister Glenbert Croes a sostene un reunion cu Mediador, DAO, Representantenan di Bureau y cu IOUWA riba refineria. Un bon reunion unda cu abiertamente a intercambia di vision y opinion pa loke ta e futuro laboral den refineria.

 

Departamento di Asunto Social den colaboracion cu Ministerio di Asunto Social y Labor ta organisando den cuadro di Aña di Famia: 𝐂𝐨𝐧𝐠𝐫𝐞𝐬𝐨 𝐝𝐢 𝐅𝐚𝐦𝐢𝐚 𝟐𝟎𝟏𝟗, 𝐶𝑜𝑛𝑠𝑡𝑟𝑢𝑦𝑒𝑛𝑑𝑜 𝑢𝑛 𝑓𝑢𝑛𝑑𝑒𝑠𝑖 𝑠𝑜𝑙𝑖𝑑𝑜! Esaki lo tuma luga 𝐷𝑖𝑎𝑑𝑜𝑚𝑖𝑛𝑔𝑜 22 𝑠𝑒𝑝𝑡𝑒𝑚𝑏𝑒𝑟 19 di 4:00 𝑝𝑚 – 8:00 𝑝𝑚 na 𝑅𝐼𝑈 𝐴𝑛𝑡𝑖𝑙𝑙𝑎𝑠. 𝐄𝐧𝐭𝐫𝐚𝐝𝐚 ta completamente 𝗚𝗿𝗮𝘁𝗶𝘀. Pa por reserva bo luga mester registra awe mes riba e link aki: https://www.asuntosocial.aw/registra.

 

Minister Glenbert Croes a reuni cu e director interino di CEDEHM – Centro di Desarayo di Hende Muhe pa loke ta e vision y plannan di e departamento aki cu ta encarga cu empodera e hende muhe. Ya awor for di nan localidad nobo, tin espacio pa por organisa diferente foro informativo pa desaroyo y empoderacion di e hende muhe.

 

E siman a cuminsa cu apertura di e Sustainable Education Symposium na Biblioteca Nacional. E tema tabata ‘Hofi di Bario’ cu oradornan local y internacional. Henter siman a duna workshop na scolnan y un hoben cu awa na wowo a impresiona un y tur cu su yamada pa tur cuminsa planta y cuida nos naturalesa. Diaranson anochi den Cas di Cultura tabata tin informacion pa publico en general tocante ‘Hofi di Bario’. 

 

Na mes momento a presenta e buki mas lesa den historia, e Bijbel pa mucha den papiamento di Aruba, cu ta papia di e Hofi di Eden. Agricultornan a presenta nan producto na e publico presente. Diaberna a clausura e siman aki di formacion di nos futuro generacionnan preparando nan pa e reto di plantacion y di Climate Change cu ta afecta nos tur.

 

DCIM100MEDIADJI_0009.JPG
Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: