Gobièrnu a yega na solushon duradero pa mantenshon di mata den área públiko.

Gobièrnu a yega na solushon duradero pa mantenshon di mata den área públiko.

Geplaatst op 12 Sèptèmber 2019 dor di Ministerio di Tráfiko, Transporte i Planifikashon Urbano

Willemstad – Minister di Tráfiko, Transporte i Planifikashon Urbano, sra. Zita Jesus- Leito ta anunsiá ku Gobièrnu a yega na un solushon duradero pa loke ta trata mantenshon, den e kaso aki muhamentu, di matanan den área públiko.

E vegetashon, esta nos matanan den área públiko tin un ròl hopi importante pa nos komunidat. E ta soru pa entre otro regulá temperatura, ofresé un habitat na flora i fauna, produsí oksígeno i tambe promové salubridat públiko tantu físiko komo mental. Sinembargo por a tuma nota ku nos matanan den área públiko pa último tèmpo no tabata risibí e mantenshon di kustumber. Banda di esaki e temperatura ku nos isla a konosé durante e último simannan tabata hopi funesto pa sobrebibensia di e matanan aki.

Gobièrnu a kai atras ku muhamentu di mata pa motibu di introdukshon di prosesonan finansiero nobo, kual a trese tardansa pa por duna enkargo na esnan konserní pa ehersé e tarea di mantenshon di e matanan.

Minister Jesus-Leito a traha inkansablemente pa logra un solushon pa ku e situashon aki. E solushon ta enserá ku esnan konserní ta risibí enkargo di Gobièrnu pa durante un periodo definí por ehèmpel 1 aña pa mantené e matanan. Ántes esaki tabata sosodé mensualmente. Di e forma aki por sigurá ku mantenshon di e matanan ta tuma lugá riba un base regular i duradero. Ya kaba por nota ku na diferente área tin kompanianan ta ehersiendo e trabounan di mantenshon nesesario na e matanan den área públiko.

Minister Jesus-Leito ta satisfecho ku Gobièrnu a yega na e solushon aki i ta hasi un apelashon na komunidat pa huntu nos ban kuida tur loke ta forma parti di nos áreanan públiko.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: