Parlamentario Curtley Obispo:E meta final ta Gobernashon den FKP riba e kaminda règt, na bienestar i progreso di mas konstrukshon di bibienda popular. Inbox x

E meta final ta Gobernashon den FKP riba e kaminda règt, na bienestar i progreso di mas konstrukshon di bibienda popular. 

Durante e reunion di Parlamento di Kòrsou di dia 22 ougùstùs 2019, parlamentario Curtley Obispo a para ketu atrobe riba e tópiko di dunamentu di kuenta i rason dor di kompanianan anónimo i fundashonnan di Pais Kòrsou. E la trese dilanti ku durante aña 2019, e la kuminsá skibi 5 karta na Ministernan puntrando pa e kuentanan anual (“jaarrekening”) di e kompanianan anónimo i fundashonnan di Pais Kòrsou. E la hasi esaki, pasombra mester kambia e pasado promé ku 29 mei 2017, di kuentanan anual ku no ta entrega na tempu na Gobièrnu di Kòrsou i Parlamento di Kòrsou. Den kaso spesífiko di Fundashon Kas Popular (FKP), tin asina tantu kuentanan anual pendiente di añanan 2012 te ku 2018, ku mester tuma pasonan urgente pa finalisá esaki nan. Ta p’esei parlamentario Curtley Obispo durante e reunion a sostené i a vota pro e moshon aprobá dor di Parlamento di Kòrsou pa Gobièrnu di Kòrsou urgi FKP di presentá no mas tarda 31 desèmber 2019, e kuentanan anual audita di añanan 2012 te ku 2018 Pa asina tin bista a base di sifranan kontrolá dor di accountant di e realidat finansiero i operashonal di FKP. E kuentanan anual te ku aña 2018 ta urgente i nesesario, pa asina portanan por habri pa asina FKP por tin e posibilidat di hasi fiansanan pa invershonnan na bienestar di bibienda popular.  

Tambe parlamentario Curtley Obispo a mustra ku pa e bon di FKP, gobernashon den FKP mester duna kuenta i rason na tempu pa medio di kuentanan anual audita. Pa asina FKP kumpli na tempu ku e lei di Corporate Governance, artíkulo 12 insiso 3 i 4 di Statutonan di FKP i e Lei di Supsidio. Tambe super importante ta: (1) e finalisashon di e “vaststellingsovereenkomst” entre FKP i Pais Kòrsou, (2) e finalisashon di e “beheersovereenkomst” entre FKP i Pais Kòrsou, (3) ehekushon di un “business plan”, (4) finansiamentu na tempu di plannan konkreto pa ku bibienda popular, (5) e “volkshuisvestingsbeleid” i (6) Pais Kòrsou pone terenonan di erfpacht disponibel pa konstrukshon di bibienda popular. Tur esaki ku e meta final ku gobernashon den FKP ta riba e kaminda règt, na bienestar i progreso di mas konstrukshon di bibienda popular. 

Pues tur esfuersonan mester wòrdu hasi den e sobra di e periodo di gobernashon 2017-2021, pa asina yega na resultadonan konkreto i positivo na bienestar i progreso di bibienda popular. Fundashon Kas Popular mester bira FUNDASHON KAS POPULAR, bahando strukturalmente e lista di espera pa bibienda popular.  Esaki ta e meta. Pa logra e meta aki, parlamentario Curtley Obispo ta konta ku tur esfuersonan di Gobièrnu di Kòrsou i Minister di Tráfiko, Transporte i Planifikashon Urbano, señora Zita Jesus Leito i gobernashon den FKP.