Promé Minister sr. Gilmar Pisas a bishitá International Center for Biosaline Agriculture na Dubai
Promé Minister sr. Gilmar Pisas a bishitá International Center for Biosaline Agriculture na Dubai
Willemstad – Promé Minister sr. Gilmar Pisas a bishitá “The International Center for Biosaline Agriculture (ICBA)” na Dubai.
Durante di e bishita aki Promé Minister sr. Pisas, huntu ku su delegashon, a haña e oportunidat pa risibí diferente informashon balioso serka Dr. Tarifa A. Alzaabi (Deputy Director General of ICBA) i su tim pa ku e funshon di e sentro di ICBA.
ICBA ta un sentro ku ta “not-for-profit” ku ta hasi investigashon riba e parti di agrikultura ku awa of suela ku infiltrashon haltu di salu.
For di momentu ku e sentro a keda establesé na UAE (United Arab Emirates) na 1999 e la bira un sentro global di ekselensia i un sosio di investigashon pa e desaroyo di referensia den diferente region.
E sentro su enfoke ta riba mehorashon di e seguridat di alimento i nutrishon, mehorashon di e seguridat di awa i un medio ambiente sostenibel, krea trabou den áreanan marginal, kualnan ta áreanan na mundu ku ta konfrontá retonan di e kantidat di salu den awa, skarsedat di awa i sekura, entre otro.
Pa Promé Minister sr. Pisas e tema di seguridat di alimento i nutrishon ta sumamemte importante i esaki tabata motibu pa kual a hasi un bishita na e sentro aki ku ta disponibel pa hasi e diferente investigashonnan ku nos tin mester i tambe duna e diferente kursonan pa asina nos ekspertonan i nos komunidat tambe por ta mas mihó prepará riba e puntonan di enfoke ku ta keda menshoná ariba.
Kòrsou ta dependé di masomenos 95% di importashon di alimento for di otro paisnan i lo mester bini ku un sistema pa kambia e ruta aki mirando kon karu tur kos ta birando na mundu. Pues un koperashon entre ICBA i Kòrsou lo nifiká hopi pa nos i Promé Minister sr. Pisas a indiká ku e lo bai hasi posibel pa nos por sigui eksplorá e posibilidatnan pa ICBA duna Kòrsou e sosten nesesario.
E kombersashonnan a kana den un hopi bon esfera i ICBA a duna di konosé ku nan ta interesá pa duna Kòrsou e sosten nesesario.
