Parlamentario Curtley Obispo:E di 4 resúmen Kuenta i Rason Aña Parlamentario 2018/2019: kapítulo 1 di 4.

E di 4 resúmen  Kuenta i Rason Aña Parlamentario 2018/2019: kapítulo 1 di 4.

Parlamentario Curtley Obispo ta sigui duna kuenta i rason na Pueblo di Kòrsou. Esaki ta e di 8 relato for di dia 4 yanüari 2017 ku e ta miembro di Parlamento di Kòrsou. E biaha aki, e di 4 resúmen Kuenta i Rason over di aña parlamentario 2018/2019 (periodo di 11 sèptèmber 2018 te ku 9 sèptèmber  2019).

 

• Reunionnan i dokumentonan di Parlamento

 

Durante e aña parlamentario 2018/2019, parlamentario Curtley Obispo a asistí, partisipá i kontribuí aktivamente na 57 di e 58 reunionnan realisá di komishon sentral i reunionnan públiko. Reunionnan pa loke ta tratamentu di leinan i tópikonan importante pa ku Gobernashon di Kòrsou. Den e kuadro aki,  pa parlamentario Curtley Obispo ta masha importante pa lesa/tuma nota di dokumentonan pa asina ta bon informá, ta bon prepará i ta bon dokumentá pa : (1) reunionnan di Parlamento di Kòrsou i (2) den e kuadro di kontròl parlamentario, por skibi kartanan ku preguntanan na ministernan di Gobièrnu di Kòrsou. Parlamento di Kòrsou a risibí durante e aña parlamentario 2018/2019 mas ku 900 dokumento kual ta konsistí di míles di página. Dokumentonan di proyektonan di lei, kartanan di Gobernador di Kòrsou, kartanan di ministernan di Gobièrnu di Kòrsou, leinan di Reino Hulandes, kartanan di miembronan di Parlamento di Kòrsou, kartanan di tersera, dekretonan nashonal, rapòrtnan, kuentanan anual, dekretonan i geloofsbrief. 

 

• Komishon fiho di Finansa i Komishon fiho di Enseñansa, Siensia, Kultura i Deporte

 

Komo Visepresidente di e Komishon fiho di Finansa, parlamentario Curtley Obispo a partisipá aktivamente na tur e 4 reunionnan realisá durante e aña parlamentario 2018/2019. Komo Presidente i miembro di e Komishon fiho di Enseñansa, Siensia, Kultura i Deporte, su  partisipashon tabata 100% pa loke ta trata e 2 reunionnan realisá.

 

• Parlatino 

 

Parlatino, e Parlamento Latino Amerikano i di Karibe formá pa 23 pais, pa parlamentario Curtley Obispo sigur tin su balor agregá pa e: (1) e konosementu ku bo ta atkerí i (2) kontaktonan ku bo ta hasi ku organisashon nan internashonal i tambe ku parlamentarionan di Latino Amérika i di Karibe. Durante e aña parlamentario 2018/2019, parlamentario Curtley Obispo konsientemente a limitá e biahenan di trabou pa Parlatino. E la limitá biahenan di trabou durante e aña parlamentario 2018/2019, na 2 biahe di trabou. E promé biahe di trabou tabata na òktober 2018 en konekshon ku e komishon di Equidad di Genero, Niñez i Juventud di Parlatino.  Di e reunion aki parlamentario Curtley Obispo a reportá ampliamente over di e tema i e proyekto di deklarashon pa kombatí violensia polítiko i akoso polítiko kontra di hende muhé. E di 2 biahe di trabou tabata na novèmber 2018 komo miembro di Directiva de Comisiones di Parlatino. Durante e reunion aki di e Directiva de Comisiones di Parlatino, a trata e resultadonan di aña 2018 i tambe e plan di trabou di aña 2019 di tur e 13 komishonnan fiho di Parlatino.