MFK: Kon por ta posibel ku Minister M. M. Alcalá-Wallé a pasa screening pa bira Minister

Na Minister Presidente

Señor Eugene Rhuggenaath

PRESENTE

 

Willemstad, 15 di sèptèmber 2019

Tópiko:  Kon por ta posibel ku Minister M. M. Alcalá-Wallé a pasa screening 

   pa bira minister, miéntras ku te awe Minister Alcalá-Wallé ta

   direktor Statutario di un N.V. privá ku yama “Alcala CQI Medische 

   Praktijk N.V.” ?

 

Honorabel Minister Rhuggenaath,                                                                                                                 

 

Frakshon di MFK a tuma nota den medionan di komunikashon i retnan sosial ku Minister di OWCS Marilyn Alcalá-Wallé, te ku resien tabata den direktiva di “Marilyn Alcalá-Wallé Foundation” i te ku awe e Minister menshoná ta direktor statutario di “Alcala CQI Medische Praktijk N.V.”, esaki ta un violashon di nos lei di screening.

 

Tambe frakshon di MFK a tuma nota di un keho ku un siudadano a entregá resientemente kontra di Minister Alcalá-Wallé pa e echonan ariba menshoná.

 

Lei di “Integriteits (kandidaats) Ministers” ta indiká lo siguiente;

 

Artíkulo 7: 

 

 

  • De kabinetsformateur doet of bevordert geen voordracht tot de benoeming van een kandidaat, indien die zich niet verdraagt met de uitkomst van enig in artikel 2, eerste lid, bedoeld onderzoek en voorts indien de kandidaat:
  • niet of niet tijdig een regeling treft om zijn zakelijke belangen op afstand te zetten dan wel nalaat zijn nevenfuncties en nevenwerkzaamheden op te geven;

 

 

Artikel 10: 

 

  1. De kandidaat is gehouden zijn zakelijke belangen op afstand te zetten en zijn nevenfuncties en nevenwerkzaamheden neer te leggen.

 

Komo formadó bo deber tabata i ta te ainda pa kontrolá ku ningun futuro minister ta den fundashonnan i/o entidatnan den nos pais.Kòrsou a konosé un mal eksperensia kaba ku un eks Minister di bo gabinete, den e kaso aki eks Minister Steven Martina. Awor ta ta resultá ku Minister Alcalá-Wallé ta no den un, pero den dos entidat. Nos ta pidi bo pa tuma nota di e ekstraktonan (di djasabra 14 di Sèptèmber 2019) for di e registro di Kámara di Komèrsio athunto.

 

Ta di lamentá ku awor ku Minister Alcalá-Wallé a sinti e kayente, ku su persona a aktua kontra di e Lei di screening, su persona a kita su nòmber komo voorzitter di su Fundashon ku ta hiba di nòmber “Marilyn Alcalá-Wallé Foundation”. Tuma nota di un ekstrakto di djasabra 14 di sèptèmber 2019 di “Marilyn Alcalá-Wallé Foundation” i kompará esaki ku e ekstrakto di 26 di ougùstùs 2019 (mira athunto).

 

Lokual ku Minister Alcalá-Wallé no a hasi ainda, te ku djasabra 14 di sèptèmber ta di kita su nòmber komo direktor statutario di “Alcala CQI Medische Praktijk N.V.” Den su hansha pa despistá pueblo di e violashon di lei ku a tuma lugar i ta tumando lugar.

 

Hasiendo uso di artíkulo 96 di Reglamentu di Orden di Parlamento, suskrito na nòmber di frakshon di MFK ta hasi e siguiente preguntanan na promé Minister Rhuggenaath;

 

  1. Minister Rhuggenaath a lesa i ta konsiente di tur artíkulo di e Lei di screening pa bira minister ?

 

  1. Si kontesta riba pregunta # 1 ta afirmativo, promé Minister por informá Parlamento ku promé Minister a kontrolá ku Minister Alcalá-Wallé no a distansia su mes for di “Marilyn Alcalá-Wallé Foundation” ku e tabata aden na momentu ku su persona a huramentá komo minister di OWCS?

 

  1. Sr. Promé Minister ta na altura ku sr. Marilyn Maria Alcalá-Wallé estando komo minister i alaves voorzitter (Chairman) di su Fundashon, a manda invitá ex studiantenan ku tin reto pa paga DUO pa un reunion dia 18 di Yuli 2019 na APC gebouw Schouwburgweg ? Wak e photo athunto.

 

  1. Promé minister ta na altura ku en todo kaso te ku 26 di ougùstùs 2019, Minister Marilyn Maria Alcalá-Wallé tabata voorzitter (Chairman) di “Marilyn Alcalá-Wallé Foundation” i ku esaki ta kontra di e lei di screening pa huramentá i ta un Minister den funshon (lei di screening “LV Integriteits (kandidaats-) Ministers ex. artikel 7; lid 1d en Art.10; lid 1”) ?

 

  1. Promé Minister ta na altura ku ta ora e asuntu aki a sali den prensa i ku tabata pendiente pa bai entregá un keho kontra di e violashon aki di nos leinan ku Minister Marilyn Maria Alcalá-Wallé a kore bai Kámara di Komersio i kita su nòmber lihé lihé, komo voorzitter (Chairman) di “Marilyn Alcalá-Wallé Foundation” (kompará e ekstrakto di Kámara di Komersio di “Marilyn Alcalá-Wallé Foundation” di dia 26 di ougùstùs 2019 ku esun di dia 14 di sèptèmber 2019, esaki ta un akto di inkubrimentu di algu inlegal ku a sosodé i ta sosodiendo) ? (Wak dokumentonan athunto)

 

  1. Promé minister ta na altura, ku te ku djasabra 14 di sèptèmber 2019, Minister Marilyn Maria Alcalá-Wallé, ta direktor statutario di “Marilyn Alcalá CQI Medische Praktijk N.V.” i ku esaki ta kontra di e lei di screening “LV Integriteits (kandidaats-) Ministers ex. artikel 7; lid 1d en Art.10; lid 1”?

 

  1. Kiko promé Minister ta bai hasi, awor ku a sali na kla ku un Minister mas a violá leinan di nos pais ?

 

Frakshon di MFK ta atvertí bo persona, pa posibel inkubrimentu di aktonan kontra di nos leinan i nos ta spera ku dentro di máksimo un luna nos haña kontesta satisfaktorio riba e asuntu grave aki.

 

Nos lo no warda ningun análisis di OM riba keho di un siudadano. Si dentro di un luna nos no tende nada di bo persona i kua lo ta e akshonnan ku lo bo tuma pa koregí e aktonan aki, nos lo yama un reunion públiko ku karakter di urgensia pa nos sali na defensa di leinan di nos pais, manera nos a hura p’e. 

 

Atentamente,

 

___________________

Charles Cooper

Miembro di Parlamento

 

  1. Gobernador di Pais Kòrsou.

This site uses Akismet to reduce spam. Learn how your comment data is processed.

%d bloggers like this: