Lansamentu di buki durante Curaçao Pride Lysanne Charles ke duna sosten i rekonosementu ku ‘HER(E)’ 

Lansamentu di buki durante Curaçao Pride

Lysanne Charles ke duna sosten i rekonosementu ku ‘HER(E)’ 

WILLEMSTAD / THE BOTTOM – Lysanne Charles, un poeta konosí di Islariba, ta presentá riba 27 sèptèmber su buki di poesia ‘HER(E): A Collection of Queer Caribbean LGBTI Affirming Poetry and Short Stories’ durante Curaçao Pride. 

E lansamentu di e buki ta tuma lugá na Moomba Beach (Piscadera) di 19.00 pa 21.00 or. E poeta lo duna tambe riba djasabra 28 di sèptèmber un masterclass pa skirbi poesia na Fleur de Marie Eatery. Partisipashon na ambos evento ta grátis. 

Na mart Charles a publiká a traves di su mes kas editorial ZamiZemiPress su buki di poesia. ‘HER(E)’ ta konsistí di 30 poesia i dos kuenta kòrtiku. E buki tabata años den preparashon i ta inspirá riba su bida komo un aktivista i poeta lesbiana habrí i orguyoso. “E buki ta trata tokante mi eksperensiá pa ‘sali for di kashi’ i mi madurashon komo un miembro di e LGBTQIA+ (lesbiana, gay, biseksual, transgénero, queer, interseksual, aseksual+) komunidat na Saba i St. Maarten. Foi yòn mi tabata sa ku mi no tabata interesá den hende muhé solamente pa amistat. Mi tabata sinti ku mi seksualidat diverso tabata problemátiko pasobra mi a wòrdu lantá katóliko. Mayoria di mi hubentut i mi bida komo yòn adulto mi tabata resa na Dios pa kita mi homoseksualidat. Esaki ta un di e motibu ku mi a publiká e buki aki. Mi deseo ta pa hoben mira nan mes den literatura, di manera ku nan no mester pasa dor di e mesun konfushon manera ami”, Charles ta bisa. 

Literatura tabata un refugio i un lugá seif pa Charles. Segun e representashon den entre otro literatura ta importante. “Si personanan LGBTQIA+ ta mas visibel, e lo ta menos doloroso pa hende sekso diverso akseptá su mes i biba su bida outéntiko.”   

Sosten

E poeta a deseá ku den su hubentut ta tin un buki manera ‘HER(E)’ k’e por a lesa. “Mi lo a sintími menos solitario den mi biahe pa aseptashon propio. Mi ta kòrda e promé bes ku mi a lesa un buki ku un persona sekso diverso of un esena di un pelíkula ku un persona LGBTQIA+ ku a wòrdu representá positivo riba pantaya. Mi tabata asombrá i sinti mi mes agradesidu. Hopi bes ta wòrdu papia riba un manera denigrante tokante persona LGBTQIA+. Ku e buki ‘HER(E)’ mi ke duna sosten i rekonosementu na esun ku no ta haña esaki”, Charles ta bisa. “Mi ta spera ku ‘HER(E)’ por ta un instrumento pa bini na un mihó komprenshon di e realidat di persona sekso diverso.” 

 

Masterclass

Charles, ta identifiká su mes komo un ‘womanist’ / feminista Karibense, autor sekso diverso i aktivista. E ta e fundadó i presidente di St. Martin Alliance For Equality (SAFE SxM). Ademas e ta e presidente aktual di Easter Caribbean Alliance for Diversity and Equality (ECADE). Komo aktivista pa derecho humano Charles ta interesá kon arte por duna un empuhe na aktivismo. Den e kuadro aki e ta duna un masterclass pa skirbi poesia riba djasabra 28 sèptèmber na Fleur de Marie Eatery. E masterclass ta pa tur hende ku ta kere den igualdat i libertat. Partisipashon ta grátis. 

E presentashon di ‘HER(E)’ ta tuma lugá na Moomba Beach (e beach di Floris Suite Hotel), riba 27 sèptèmber di 19.00 pa 21.00 or. Un i tur ta bon bini. E masterclass pa skirbi poesia riba 28 sèptèmber ta di 09.00 pa 11.30 or. Bo por meldú pa e masterclass na  heremasterclass@gmail.com te 26 sèptèmber. Curaçao Pride ta tuma lugá di 26 pa 29 sèptèmber. Pa mas informashon bishitá: https://www.facebook.com/events/471098850408606/