DIA DI LIDER DI KRÈSH 20 DI SÈPTÈMBER 2019

DIA DI LIDER DI KRÈSH 20 DI SÈPTÈMBER 2019

 

Kralendijk – Djabièrnè dia 20 di sèptèmber ta selebrá dia di trahadónan pedagógiko den akohida pa mucha. 

 

Na 2010 Gobièrnu di Boneiru a dekretá e di 3 djabièrnè di luna di sèptèmber komo dia pa trahadónan pedagógiko ántes ta lider di Kresh. Esaki debí na e apresio ku tin pa personanan ku ta ehersé e ofishi aki.

 

Por duna di pensa ku e trabou aki ta unu masha fásil. Ta djis tira bista riba nan, hasi algun aktividat, duna di kome i bebe ta tur e kos. 

Eksigensia pa un trahadó pedagógiko ta bai hopi mas leu ku loke a wòrdu menshoná. 

 

Un trahadó pedagógiko mester tin bista riba e desaroyo di e mucha, e mester por opservá siñalá, reportá na momentu ku tin algu ku e desaroyo di e mucha. E mester ta un persona ku ta stimulá e mucha pa desaroyá su talentonan. E mester por duna e mucha amor i kariño, mirando e echo ku e ta remplasá e mayornan durante e oranan ku nan no ta disponibel. 

 

Nan mester por atendé ku tur klase di deseo di mayornan. Un klas ku 8 mucha ya no ta fási,l ta 8 diferente deseo di mayor. E trahadó pedagógiko mester por yuda un mucha den su preparashon pa skol primario.

E trahadó pedagógiko mester ta apto pa duna guia na momento kue mucha tin tarea di skol.

 

Asina nos por sigui menshoná kompetensia ku un trahadó pedagógiko den akohida pa mucha mester tin.

Gobièrnu di Boneiru ta mira e importansia, i ta komprometé su mes pa yuda e trahadó pedagógiko ku instrumentonan nesesario pa e por hasi su trabou mas mihó ku ta posibel.

 

Pa medio di diferente proyekto i programa manera BES(t) 4 kids, gobièrnu di Boneiru ta duna e oportunidat di kapasitashon.

E aña aki a terminá ku e treinen di Kaleidoscoop pa mènedjer i ta bai kuminsá pronto un treinen di “train the trainer” den Kaleidoscoop. Kaleidoscoop ta un método pa edukashon pre- eskolar.

 

Banda di esei huntu ku MBO Bonaire a traha un plan di formashon pa asina por tin mas trahadó pedagógiko riba e nivel rekerí. 

Tambe pa medio di e Proyekto BES(t) 4kids lo duna oportunidat na algun lider pedagógiko pa tuma parti na e kurso “Conscious Discipline” na Aruba.

 

Gobièrnu di Boneiru kier a felisitá i gradisí tur trahadónan pedagógiko pa nan dedikashon i amor ku nan tin pa e trabou ku i pa nos muchanan.

Sigui ku e bon trabou na bienestar di nos muchanan, nos futuro di Boneiru!