PAR ta aklara konsternashon rondo di Minister Alcala-Walle

PAR ta aklara konsternashon rondo di Minister Alcala-Walle

 

Willemstad – Direktiva di Partido Alternativa Real (PAR) a tuma nota di konsternashon insistente  den media, rondo di miembro di PAR sra. Marilyn Alcala Walle, kual ta aktual Minister di Enseñansa, Siensia, Kultura i Deporte, pa loke ta trata su afiliashon i partisipashon den diferente fundashon boluntario.

 

PAR ta haña sumamente importante pa duna informashon korekto na komunidat i aklara lokenan por ta menos kla. Ademas ta lamentá ku kontrinkantenan polítiko ta purba di influensia e opinion públiko ku informashon robes.

 

Minister Alcala-Walle no ta bou di ningun investigashon. Pa PAR integridat di Minister Alcala-Walle no ta den diskushon e Minister ta konta ku sosten di partido i ta kontinua ku su trabounan di Minister riba e area di enseñansa, siensa, kultura i deporte.

 

Komo un partido serio ku ta hasi lo maksimo pa asina kumpli ku e meta di hiba nos pais dilanti, nos ta lamenta tipo di situashonnan ku ta krea divishon i mas deskonfiansa pu ku mandatarionan di nos komunidat. Na e momentunan aki mas ku nunka, nos mester uni forsa i traha huntu pa saka kara di nos pais ku ta yena di potensial.