Parlatino ku atenshon pa kombatí violensia polítiko kontra di hende muhé

Parlatino ku atenshon pa kombatí violensia polítiko kontra di hende muhé

 

Durante e reunion di Parlatino, Parlamento Latino-Amerikano i Karibense, ku a tuma lugá na Cuba dia 19 i 20 de sèptèmber último a atendé entre otro e tema di violensia polítiko kontra di hende muhé.

Violensia polítiko kontra di hende muhé ta e akto di violensia kontra di un polítiko femenino pa manipulá òf deskurashá esaki den su trabounan polítiko te asta pa e bandoná e arena polítiko pa motibu di otro interesnan. E importansia pa atendé e tipo di violensia aki ta pa motibu ku e ta stroba desaroyo di e hende muhé i konsekuentemente desaroyo di su pais.

 

E ta un violashon di derechinan humano i violashon di derechi polítiko di e hende muhé.

E violensia por ta verbal, sikológiko òf físiko. E último desenionan Sosial Media ta e aria mas spantoso pa e hende muhé den polítika.

E por tin konsekuensianan sikológiko i emoshonal severo.  Esaki por reflehá den un forma negativo den e produktividat di e polítiko pero tambe riba partisipashon di hende muhé den polítika.

E violensia aki òf miedu pa e violensia aki ta stroba partisipashon total di e hende muhé den polítika.

Sin partisipashon safe di e hende muhé den polítika i riba un base di igualdat nos lo no logra un demokrasia berdadero.

 

E Agènda di Nashonnan Uni pa desaroyo duradero ta pa eradiká tur tipo di violensia kontra di hende muhé pa 2030. Esaki miéntras riba violensia polítiko kontra di hende muhé no tin sufisiente konsientisashon apesar ku e ta esun mas trágiko.

Kada voto i bos pèrdí den Parlamento dor di e violashon aki ta afektá nos tur a lo largu den e komunidat aki.

 

Pa e motibu aki Nashonnan Uni ta boga pa yega na paridat den parlamento kaminda e representashon di hende muhé mester reflehá e porsentahe di hende muhé den nos komunidat. Esaki lo ta den e órden di 50 porshento.

Na Kòrsou segun sifranan di nos ofisina di statistik, CBS, nos komunidat ta konsistí di 54% di hende muhé i 46% di hende hòmber miéntras den parlamento tin un representashon di 24 % hende muhé i 76% hende hòmber.

For di estudionan ta resultá ku mayoria kaso di violensia polítika kontra di hende tin nan orígen den e partido mes ku e polítiko ta pertenesé na dje.

 

Pa kombatí violensia polítiko kontra di hende muhé mester bini ku leinan pa krea un atmósfera safe pa e hende muhé traha I mester envolví e hende hòmber pa esaki tambe.

Leinan di igualdat mester ta na lugá i mester tin e posibilidat pa hasi denunsia.

Tambe mester kambia e kultura polítiko, envolví e hende hòmbernan i media siendo un ehèmpel pa bo komunidat.

Nos bista mester ta fihá riba oumentá produktividat de hende muhé i nan entrada.

Pa logra esaki mester integrá mas hende muhé den e proseso di toma di desishon.

Den e kuadro di konsientisashon riba e problemátika, su konsekuensianan i kon pa kombatí esaki UNO Mujeres, e organisashon di Nashonnan Uni ku ta toka hende muhé, ta organisá un seminario regional dia 27 di novèmber binidero na Panamá. 

 

Marilyn Moses

Frakshon di MP

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: