Prome Minister Evelyn Wever-Croes: Durante reunionnan na New York,  PROME MINISTER WEVER-CROES A ATENDE CU E RELACION DEN REINO

Prome Minister Evelyn Wever-Croes:

 

Durante reunionnan na New York, 

PROME MINISTER WEVER-CROES A ATENDE CU E RELACION DEN REINO

 

Durante e siman di Asemblea General di Nacionnan Uni na New York siman pasa, e delegacion di Reino a atende cu e relacion den Reino. E delegacion Hulandes a consisti di Su Mahestad Willem Alexander y Reina Maxima, e Prome Ministernan di e 4 paisnan di Reino Hulandes: Premier di Hulanda, Mark Rutte, Prome Minister Evelyn Wever-Croes di Aruba, Prome Minister Eugene Rhuggenaath di Corsou y Prome Minister Leona Marlin-Romeo di Sint Maarten.

 

E delegacion di Reino Hulandes tawata presente tambe na e discurso cu Rey Willem Alexander a hiba den nomber di Reino den e Asemblea General. Den su discurso, Su Mahestad Willem Alexander a enfatisa riba e derecho di tur hende riba oportunidadnan igual. Esaki Reino ta para su tras y ta e deseo tambe di Reino pa henter mundo.

 

Tambe e delegacion di Reino Hulandes a atende e evento di Reina Maxima. Reina Maxima, 10 aña pasa a wordo apunta como “Special Advocate” di Nacionan Uni cu e mision pa logra inclusion financiero. Su meta ta pa mas y mas hende na mundo tin acceso na cuentanan bancario. Esaki ta duna e hende e caminda pa independencia. Reina Maxima a presenta un reportahe di su trabounan impresionante den varios parti di mundo. Den e ultimo 10 aña tawata tin hopi logro riba e tereno di inclusion financiero. Varios di esnan cu a wordo yuda pa haya acceso na cuenta bancario a wordo facilita tambe den e forma di haci negoshi specialmente den paisnan na unda cu e situacion economico ta hopi dificil. 

 

Aparte di atende e discurso di Rey Willem Alexander y evento di Reina Maxima, e integrantenan di delegacion di Reino tawata tin diferente reunion separa cu ta regarda nan propio pais y of carteranan. 

 

A probecha tambe pa un reunion na nivel di Reino entre Rey Willem Alexander, Reina Maxima y e 4 Prome Ministernan di Reino unda cu a enfatisa e importancia pa tin un bon relacion den Reino. Den e reunion aki, a compara Reino cu un hoya. Tin biaha tin friccion. Pero mescos cu un hoya, e relacion ta bira mas bunita cu cada friccion. 

 

“Di mi parti mi a trece padilanti cu nos ta trahando duro pa logra e metanan financiero proponi den e protocol, loke nos mester ta tempo y espacio pa atende cu e crisis financiero cu Gabinete Wever-Croes a hereda mesun momento cu nos ta atende cu e crisis social y e crisis di Venezuela. No ta facil pero nos ta bayendo den bon rumbo y mas importante, nos ta atendiendo e retonan nos dilanti. Esaki tambe a wordo treci dilanti den e reunion na unda cu nan ta reconoce e esfuersonan di Gobierno cu ta hibando nos pais den e bon caminda. Financieramente, Gobierno ta poniendo orden irba e situacion financiero di nos pais apesar di tur reto cu tin, y apesar cu no ta facil, pero nos ta haciendo lo maximo posibel”, Prome Minister a enfatisa.

 

Gobierno a hereda un pais cu un debe di casi 90 % di GDP y awe, casi dos aña despues, cu esfuersonan grandi, e ta na 78% di GDP. Gobierno a hereda un pais cu bou di e gobierno anterior a mira deficitnan di 300 pa 400 miyon florin, awe, nos ta mira deficit di 25 miyon florin. Y na e momento aki, Gobierno ta trahando riba e prome ‘Balanced Budget’ den hopi aña pa pais Aruba. E ‘Balanced Budget’ pa 2020, lo wordo presenta pronto. 

 

Aruba no solamente ta bayendo bon financieramente, pero economicamente tambe cu un crecemento ecomico di 2.4% e aña aki y ta premira cu pa otro aña e crecemto economico lo ta di 3%. Desempleo tambe ta bahando. Nos tin un turismo fuerte cu ta creciendo. E aña aki, e prome dos kwartal e cantidad di turista a subi cu 2.8% y e entrada di turismo a subi cu 8.9%.

 

“Esaki ta yena mi cu hopi satisfaccion y orguyo. Esaki ta duna mi tambe hopi animo pa sigui lucha pa finalisa e proceso pa yega na ‘Balanced Budget’ y asina e añanan cu Aruba tawata tin deficitnan finaciero keda pa pasado y di awo en adelante nos conoce finansas saludabel. Di e manera aki tambe nos ta gana bek e confiansa mundial cu Aruba ta un pais solido y estable cu tin un gobierno serio. E reunion riba nivel di Reino a bay hopi bon y mi tin confiansa cu esaki ta habri oportunidadnan pa nos”, Prome Minister a termina bisando. 

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: