Problemanan ku ta keda manifestá, relashoná ku Feffik i ku tin komo konsekuensia ku alumnonan ta wòrdu perhudiká

Na: Minister Enseñansa, Siensia, Kultura i Deporte,

Señora Marylin Alcala-Walle

PRESENTE

 

Tópiko: Problemanan ku ta keda manifestá, relashoná ku Feffik i ku tin komo konsekuensia ku alumnonan ta wòrdu perhudiká

 

Kòrsou, 3 di òktober 2019,

 

Honorabel señora Alcala-Walle,

 

Frakshon di MFK a tuma nota ku ainda Feffik ta un problema, debí ku no ta atendé e problemátiko aki manera mester ta, alumnonan ta esnan ku ta wòrdu perhudiká den sentido ku nan no ta haña lès pa forma nan mes.

 

A primintí e alumnonan ku nan lo kuminsá aña eskolar na e skol Nilda Pinto i den pasado tambe gobiernu tantu Minister Alcala-Walle komo Minister Koeiman a informá komunidat i alumnonan ku lo bin ku un instituto nobo ku lo bai enkargá su mes ku duna kursonan di fishi.

 

Siman pasa nos a tuma nota ku alumnonan un biaha mas mester a akshoná debí ku no tin klaridat pa nan riba e enseñansa ku nan mester risibí. Minister Alcala-Walle no ta duna kara i ta laga ámtenar nan duna e hóbennan informashon ku despues ta ser kambia sin informá e hóbennan debidamente. 

 

Mirando ku e novela di Feffik no tin fin di terminá, hasiendo uso di artíkulo 96 di Reglamentu di Orden di Parlamento mi ta hasi Minister Alcala-Walle e siguiente preguntanan;

 

1. Minister por informá Parlamento kiko ta e status di entidat Feffik?

 

1. E skol Nilda Pinto a pone un T patras di e nòmber pa e sekshon ku ta bai duna e eks alumnonan di Feffik, pa kiko e T aki ta para i si esaki ta bèrdat?

 

1. Nilda Pinto ta dispone di tur material i makinaria ku tin mester pa duna edukashon na e alumnonan di Feffik?

 

1. Edukashon di fishi manera tabata wòrdu duna na Feffik ta kai bou di responsabilidat di Minister di Enseñansa òf bou di Minister di labor?

 

1. Nilda Pinto ta dispone di material didáktiko i tambe material por eskrito pa por duna e lèsnan ku e alumnonan mester haña?

 

1. Nilda Pinto ta dispone di maestronan ku ta kapasitá pa duna e lèsnan ku tabata ser duna na Feffik?

 

1. E curriculum ku tabatin na Feffik, esaki a keda igual na Nilda Pinto?

 

1. Minister por splika konta bai spar gastu awor ku a pasa e alumnonan di Feffik pa Nilda Pinto?

 

1. E problemanan ku a presentá último simannan ku a pone ku e alumnonan a protesta a wòrdu solushoná?

 

1. Minister por splika kiko eksaktamente ta e status di e alumnonan, si nan ta hañando lès i si e problemanan aki ta solushoná definitivamente?

 

Suskrito ta keda pendiente di kontesta i ta spera ku pronto e problemanan rondó di Feffik lo ser solushoná na bienestar di e hóbennan, kual ta esnan ku al final ta wòrdu perhudiká.

Atentamente,

 

Gilbert Doran

Parlamentario pa 

Frakshon di MFK

 

Willemstad, 3 di òktober 2019

 

Na: Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Señor Presidente, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na Minister Marilyn Alcala-Walle enkargá ku Enseñansa, Siensia, Kultura i Deporte, ku preguntanan ku mi persona ta hasi na e minister konserní.

 

Danki pa e koperashon.

Atentamente,

 

___________________                 

Gilbert Doran

Miembro di Parlamento

pa Frakshon di MFK