E bèrdat di Komishonnan Temporal di Parlamento di Kòrsou.

E bèrdat di Komishonnan Temporal di Parlamento di Kòrsou.

E bèrdat for di dia 10 òktober 2010 segun Reglamento di Órden di Parlamento di Kòrsou ta: ku ora un Komishon Temporal ta instalá, tur 21 miembro di Parlamento di Kòrsou ta outorisá pa asistí, deliberá i duna nan aporte den tur Komishonnan Temporal di Parlamento di Kòrsou. Miembronan di e Komishonnan Temporal elegí pa e Parlamento di Kòrsou i despues instalá den e komishon tin e derecho adishonal di vota den e Komishon Temporal pa asina entre otro raporta na e Komishon Sentral di Parlamento di Kòrsou. 

Miembro di Parlamento di Kòrsou, Curtley Obispo durante e reunion di Komishon Sentral  di Parlamento di Kòrsou riba 2 di òktober 2019 a trese padilanti ku ta bon pa henter Pueblo di Kòrsou sa e bèrdat aki di Komishonnan Temporal segun e Reglamento di Órden di Parlamento di Kòrsou. Ta e promé Parlamento di Kòrsou a disidí esaki riba 10 òktober 2010. P’esei parlamentario Curtley Obispo tambe a indiká ku e no por kambia historia i tur parlamentario sa bon bon esaki inkluyendo e grupo di aktual miembronan veterano den nos Parlamento di Kòrsou ku tambe a forma parti di e promé Parlamento di Kòrsou i e promé Gobièrnu di Kòrsou. Ta ku e aprobashon di 10 di òktober 2010 di e promé Parlamento di Kòrsou ta indiká i ta konfirmá bon kla kon Komishonnan Temporal tin ku funshoná. Aprobashon di e Reglamento di Órden ku despues riba 24 ougùstùs 2012 , e promé Gobièrnu di Kòrsou a publiká den un dekreto nashonal (PB 2012 no. 50).

Pues e reglamento di Órden ta indiká bon kla i raspa kon Komishonnan Temporal ta funshoná ora nan wòrdu instalá, inkluyendo e Komishon Temporal preparashon investigashon di Hospital Nobo Otrabanda. Ta di rekordá tambe e otro bèrdat riba di 13 di sèptèmber 2019:  e desishonnan unánime di Parlamento di Kòrsou den un Reunion Publiko pa entre otro: (1) instalá e Komishon Temporal  preparashon investigashon Hospital Nobo Otrabanda i (2) e rapòrt ku proposishonnan di e komishon aki  mester bai pa e Komishon Sentral di 21 miembronan di Parlamento di Kòrsou. Pa asina atrobe tur 21 miembro di Parlamento di Kòrsou por asistí, deliberá, duna nan aporte pa ku e rapòrt ku proposishonnan di e Komishon Temporal preparashon investigashon Hospital Nobo Otrabanda.