Gisette Seferina (PAR):  E problema kardinal den tur ámbito aki na Kòrsou ta falta di KONTRÒL!

Gisette Seferina (PAR):  E problema kardinal den tur ámbito aki na Kòrsou ta falta di KONTRÒL!

 

WILLEMSTAD-  Aktualmente ta biba e impreshon aki na Kòrsou ku outoridat kompetente ta pèrdiendo e bataya pa mantené òrdu den tur ámbito di nos komunidat. E sintimentu aki ta demotivá e siudadano ku tur dia ta hasi un esfuerso pa kumpli ku nos lei i reglanan vigente. Parlamentario Seferina ta proponé pa gobièrnu presta mas atenshon na aspektonan simpel di kontrol i kumplimentu ku regla i lei, pa duna aliento na pueblo.

 

Gisette Seferina (PAR) a tuma nota di un preokupashon kresiente ku nos pueblo ta ekspresá, esta , ku nos pais a para bira manera un “free- for- all”. Seferina ta proponé gobièrnu pa duna atendementu ku sierto kosnan chikitu ku ta kousa iritashon grandi serka pueblo prioridat. Entre e temanan ku ta bini dilanti kada bes tin e no kumplimentu di reglanan di tráfiko, tiramentu di sushi riba kaya, hasimentu di negoshi sin pèrmit válido, i vários aspekto mas di mantenshon di òrdu públiko.

 

Hopi biaha e iritashon di pueblo ta enserá detayenan relativamente simpel di maneho diario (bedrijfsvoering) den e ministerionan di gobièrnu. Un aspekto importante  ku por drecha fásilmente ta e manera ku aktualmente ta registrá i kanalisá kehonan ku ta drenta na e diferente ministerionan tokante kibramentu di regla i lei. “Kon por ta posibel, por ehèmpel,  ku un siudadano den nesesidat di un servisio o informashon ta yama un ofisina di gobièrnu te kansa, sin haña e servisio deseá, òf sin ku ta atendé ku su keho na un manera serio? Pues ta komo si fuera no tin un kontròl di kalidat struktural di e produkto/ servisio ku gobièrnu ta brinda pueblo”, asina Sra. Seferina a deklará.

 

Seferina ta kòrda ku promé ku 10-10-10, gobièrnu insular di Kòrsou a tuma e desishon ku ta bai dirigí e aparato públiko den direkshon di ménos énfasis riba ehekushon i mas énfasis riba maneho. E desishon aki lo a nifiká ku e aparato gubernamental lo a bai hasi ménos kontròl ku ta rekerí presensia di kontrolùr den kaya, miéntras lo a alsa efektividat di e maneho pa medio di entre otro supervishon efisiente i multa atministrativo na momento ku konstatá inkumplimentu ku nos regla i leinan.

 

“E intento pa transformá e aparato gubernamental den un aparato ku ta mas fuerte riba maneho, di manera ku por a pone ménos énfasis riba ehekushon i kontròl simplemente NO A FUNSHONÁ !” Segun Seferina, konsekuensia di e situashon aki ta ku e aparato gubernamental a pèrdè e abilidat di generá e sifra i datonan manera tabata ántes, tempu ku tabatin mas kontròl físiko. E sifra i datonan, produkto di kontrol, tabata fungi komo un instrumento pa formulá o adoptá un maneho efektivo. “Awendia, riba kiko ta basa maneho anto??” 

 

Hustamente den e siman aki ku Kòrsou ta konmemorá su status di pais outónomo den reino, ta bon pa nos para ketu na e kosnan simpel manera kontròl, ku pa motibu di e retonan grandi ku nos pais hóben ta konfrontá, poulatinamente a para bira retonan adishonal pa nos hendenan, ku ta kousa iritashon sin ta na nodi. 

Gisette Seferina

Miembro di Frakshon