Fundashon Kresh Tera Kora / Sentro Pre-eskolar Tera Kora

  Fundashon Kresh Tera Kora / Sentro Pre-eskolar Tera Kora

 

Na aña 1984 Dienst Sociale Zaken huntu ku algun habitante a tene un enkuesta den bario di Tera Kòrá. For di enkuesta a sali na kla ku tabatin nesesidat di un lugá pa laga muchanan di 0 pa 4 aña. Salí for di e pensamentu aki algun habitante huntu ku un funshonario di Dienst Sociale Zaken a tuma initiativa pa lanta “Komishon Krèsh Tera Kòrá”.

 

Dia 16 di òktober 1984 “Fundashon Krèsh Tera Kòrá” a bira un echo despues ku e komishon a traha e statuto di krèsh i tambe a pidi supsidio pa krèsh.

 

Un aña despues, 16 di sèptember 1985, aunke ku no a keda kla ku e supsidio, e krèsh a bira un realidat. E krèsh a ubiká den un kas di “Woningbouw Curaçao N.V.” Un aña largu tur hende a traha boluntariamente. Na aña 1986 e krèsh a haña supsidio di gobiernu. 

Dor ku e lista di espera a bira asina largu a kuminsa pensa di un edifisio nobo pa krèsh.

Na aña 1987 krèsh a muda pa su edifisio nobo, kual tabata konsisti di 1e i 2e fase di e krèsh. Na aña 1999 e terser fase a bin kla. 

E kapasidat máksimo di krèsh ta 100 mucha, reparti riba 4 sala: sala Blenchi, sala Barika Hel, sala Mòfi i sala Trupial.

Awendia e krèsh yama “Sentro pre eskolar Tera Kòrá”.

 

E meta di e sentro aki ta pa duna posibilidat pa akohida pa mucha den e edat di 0 aña pa 4 aña durante un parti di e dia, na kua  ta ofrese e muchanan kuido diario, pero tambe ta guia e muchanan segun un programa pedagogiko profesional. 

 

Vishon di Sentro pre eskolar Tera Kòrá ta pa ofresé tur mucha ku ta bishita e sentro un oportunidat pa bira suidadanonan balioso. Suidadanonan ku ta sigur di nan mes, responsabel i ku por funshoná independiente den nos sosiedat.

 

Vishon edukativa ta ku nos ta konsiderá ku ta importante pa nos muchanan tin un ambiente sigur kaminda nan por desaroyá nan mes den tur área siñando aktivo.

 

Sentro pre eskolar Tera Kòrá ta habrí di djaluna te ku djabierne for di mainta 6.15 or te 18.00 or.

E sentro aki ta ofrese e.o.

-Kuminda kayente i balansá bou di guia di un dietista;

-E muchanan ta siña aktivo via e programa pedagógiko “Kaleidoscoop”;

-Un medio ambiente físiko i emoshonal sigur pa e muchanan su desaroyo.

 

Djarason 16 di òktober 2019 Fundashon Krèsh Tera Kòrá  ta eksisti 35 aña i ainda e Krèsh aki tin un nifikashon hopi importante pa sigur e bario di Westpunt te Seru Grandi.