Promé Minister Rhuggenaath ta biaha pa Brusélas komo Presidente di teritorionan Oropeo (OCTA)

Promé Minister Rhuggenaath ta biaha pa Brusélas komo Presidente di teritorionan Oropeo (OCTA)

Geplaatst op 13 Òktober 2019 dor di Ministerio di Asuntunan General i Promé Minister

WILLEMSTAD — E siman benidero, dia 14-18 òktober, Promé Minister Rhuggenaath lo biaha pa Brussels pa topa ku ofisialnan di Komishon Oropeo i OCTA,  i tambe asistí na un konferensia di OCTA riba e tema di Oséano. Ademas e lo hasi un bishita di 1 dia na Hulanda pa papia ku Sekretario di Estado Sr. Raymond Knops i Minister-presidente Mark Rutte.

Na febrüari 2019, Promé Minister Rhuggenaath ofisialmente a keda instalá komo Presidente di e Asosiashon di teritorionan i paisnan Oropeo pafó di Oropa (OCTA), miho konosí komo “LGO”. Promé Minister Rhuggenaath no por a biaha bai na momentu di instalashon pa motibu di desaroyonan na Kòrsou relashoná ku búskeda di un partner pa nos refineria den e luna ei.

E bishita na Brusélas lo ta su promé bishita komo Presidente di OCTA pa aña 2019-2020. Komo Presidente di OCTA, Kòrsou den ròl di e Promé Minister, ta kara di e asosiashon di teritorionan i paisnan Oropeo pafó di Oropa (OCTA). Esaki ta enserá tur pais ku tin un relashon ku Union Oropeo komo pais outónomo di un di e estadonan ku ta miembro di EU. E paisnan miembro ta Fransia, Gran Bretaña, Hulanda i Dinamarka. Komo Presidente di e asosiashon OCTA, Promé Minister ta inisiá i guia e organisashon pa logra metanan stipulá pa e aña i tambe forma lasonan na nòmber di e asosiashon OCTA ku otro organisashonnan regional i internashonal.

Durante su bishita na Brusélas, Promé Minister Rhuggenaath lo kombersá ku Vise-presidente di Komishon Oropeo, sr. Timmermans. Komishon Oropeo ta e órgano ehekutivo ku ta tuma desishon riba maneho pa henter Union Oropeo i paisnan miembro. E lo kombersá tambe ku e Sekretario-General di e Asosiashon di paisnan Afrikano, Karibense i Pasífiko. Ta importante pa e Asosiashon di OCTA, ku tin teritorionan Oropeo tambe situá den region Afrikano, Karibense i Pasífiko, pa mantené i fortifiká e lasonan ku paisnan bisiña. Lo e topa ku su susesor, Presidente di OCTA pa aña 2020-2021, ku ta Presidente di New-Caledonia.

Promé Minister Rhuggenaath lo hasi apertura di un konferensia riba e tema di Oséano. Na nivel Oropeo pero tambe serka Nashonnan Uní, e tópiko di Oséano lo haña mas atenshon den añanan benidero. Hopi di e paisnan di OCTA ta islanan rondoná dor di oséano ku ta un rekurso importante pa ekonomia i bienestar di e paisnan. Tin fondonan di desaroyo 11 (EDF 11) ku por bira disponibel spesífikamente pa yuda paisnan den region Karibense ku maneho i konservashon di oséano, resistensia i energia renobabel. Den e kuadro aki, Kòrsou ta trahando aworakí riba un propio petishon pa risibí fondonan di Fondo Desaroyo 11 ku lo bai pa proyektonan ku ta yuda fortifiká un komunidat duradero i resistente (Building Sustainable and Resilient Communities).

Meta di e konferensia na Brusélas ta pa trese tur e 25 paisnan miembro di OCTA huntu pa uni i fiha un posishon komo teritorio spesial di Union Oropeo. Lo trata temanan manera biodiversidat, área marino protehá, estudio i inovashon, “blue economy” i oportunidat serka Union Oropeo pa haña fondo i kapasidat tékniko. Na final lo firma un deklarashon pa Oséano ku lo stipulá palabrashonnan pa futuro riba e tema di maneho di oséano.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: