Apesar di amplio diskushonnan den pasado, Partido nobo KEM ta kontra bòxnan di pòst

Apesar di amplio diskushonnan den pasado, 

 

Partido nobo KEM ta kontra bòxnan di pòst

 

Willemstad – Un biaha mas Partido KEM ta mira kon oposishon i koalishon ta bringa ku otro i tira otro ku lodo embes di ta wak sufrimentu di pueblo manera ta e kaso ku introdukshon di bòxnan di pòst poné pa habitantenan di sierto bario por bai rekohé nan pòst. Ta un realidat ku e boxnan aki tin algu inhumano mirando ku tin hende grandi i tambe hendenan deshabilitá ku mester sali for di nan kas pa bai buska nan pòst. Remarkabel ta ku semper ta e barionan den mas nesesidat e tipo di maneho i òf medidanan aki ta konta ku porsierto ta keda implementá sin hasi un enkuesta anteriormente bou di habitantenan pa midi grado di aseptashon. Partido KEM ta bon na altura ku uzo di e bòxnan di pòst ta un desaroyo ku ta tuma lugá na hopi pais pa redusí gastu, pero mester tene kuenta ku planifikashon i struktura di bario di e paisnan ei ta hopi diferente for di nos. 

Partido KEM ta kondená e argumento ku den kaso un siudadano pa kualkier motibu no por yega na su bòx, por laga otro persona bai buska e pòst pa nan. Ta un abusu kon hendenan di barionan manera Nieuw Nederland, Monte Vèrdè, Sherasiel, Parera, Coronèt i Wageningenplein mester sali nan kas i kana pa bai kue nan pòst. Ta bisto ku e gobièrnu aki no tin kurason pa su pueblo i muy en partikular personanan deshabilitá i personanan ku pa kualkier motibu no por sali nan kas riba nan propio forsa. Ta evidente tambe ku no a evaluá e parti di seguridat. Por ehèmpel habitantenan di Groot Kwartier mester krusa un karetera bastante drùk, bula vangrail i bolbe krusa kaya pa bai buska nan pòst. Na Boka Samí habitantenan a para duru i bisa ku si e bòxnan yega einan, nan lo bai para den fondo di laman pa piská pone webu aden. Partido KEM ta hasi un apelashon na gobièrnu pa kita e bòxnan di pòst awor na bienestar di pueblo paso tur hende ke risibí su pòst na kas. Alabes pòst di kada persona ta algu konfidensial i personal. Dikon ta trata nos propio hendenan asina i sin mas nos grandinan? Foei gobièrnu foei.

 

 

KEM KEM

 

This site uses Akismet to reduce spam. Learn how your comment data is processed.

%d bloggers like this: