Prome Minister Evelyn Wever-Croes: PROYECTO SUPERNOVA DI FUNDACION FUTURA PA MUCHANAN MUHE ENTRE 12 PA 15 AÑA Lo enfoca riba e topico STEM: Ciencia, Tecnologia, Engineria y Matematica
Prome Minister Evelyn Wever-Croes:
PROYECTO SUPERNOVA DI FUNDACION FUTURA PA MUCHANAN MUHE ENTRE 12 PA 15 AÑA
Lo enfoca riba e topico STEM: Ciencia, Tecnologia, Engineria y Matematica
Recien mundo a celebra Dia Internacional di Mucha Muhe (International Day of the Girl di United Nations). Pa Aruba tambe esaki ta un topico sumamente importante. FUTURA, durante e siman di innovacion di Aruba, ta preparando un bunita proyecto cu yama Supernova y lo bay enfoca riba muchanan muhe den innovacion.
Supernova ta un studio experimental pa mucha muhe, un evento estilo “pop-up” rond di Aruba caminda muchanan muhe di tur edad por bini hunto pa intercambia ideanan, colabora, inspira otro y siña habilidadnan nobo na diferente localidadnan rond di Aruba, dunando asina oportunidadnan na tur muchanan muhe pa participa. E proyecto aki ta stimula Igualdad di Genero cu ta meta number 5 di SDG, cu ta e Sustainable Development Goals y ta percura pa nos muchanan muhe no keda atras.
E prome evento di Supernova lo ta dia 29 di october, durante ‘Immerse Innovation Week’, pa muchanan muhe di 12 pa 15 aña y e topico lo ta STEM: Ciencia, Tecnologia, Engineria y Matematica. Globalmente, cuponan di trabou den STEM ta creciendo mas cu tur otro y e ta importante pa motiva muchanan muhe pa explora STEM, door cu e ramonan aki ta domina door di hende homber actualmente na Aruba. Pa e motibo aki nos mester stimula interes den mas muchanan muhe den e materia aki.
Durante Supernova, muchanan muhe participando lo cera conoci cu Arubianonan femenino cu a studia y gradua di estudio den STEM y scucha un tiki di nan experiencia. Tambe nan lo tin e oportunidad pa explora STEM den maneranan creativo durante e workshop.
E proyecto aki ta kick off durante Siman di Innovacion y lo sigui durante 2020. Futuro eventonan di Supernova lo explora otro topiconan pa yuda desaroya nos muchanan muhe pa nan ta pioneronan innovativo y yuda carga nos pais den futuro.
Prome Minister Evelyn Wever-Croes ta encurasha mayornan cu tin yiunan muhe entre edad di 12 pa 15 aña, pa encurasha nan yiunan pa participa na e evento bunita aki cu por yuda nan dicidi nan futuro estudio of trabounan.