Parlamentario Curtley Obispo: karta dirigi na Minister di Desaroyo Ekonómiko, Minister señora Giselle McWilliam, ku tópiko: status di kuentanan anual pendiente te ku aña 2017 di fundashonnan di Pais Kòrsou ku ta kai bou di portafolio di Minister di Desaroyo Ekonómiko.

Minister di Desaroyo Ekonómiko  

Señora Giselle McWilliam

Pletterijweg #43

Presente

 

Djamars, 15 òktober 2019

 

Tópiko: status di kuentanan anual pendiente te ku aña 2017 di fundashonnan di Pais Kòrsou ku ta kai bou di portafolio di Minister di Desaroyo Ekonómiko.

 

Apresiabel señora Minister Giselle McWilliam,

 

Duna kuenta i rason na tempu ta konta tambe pa fundashonnan ku ta entidatnan di Pais Kòrsou. Fundashonnan ku ta entidatnan di Pais Kòrsou, ku segun nan statutonan i e lei di Corporate Governance, mester kumpli i entrega tur aña na tempu nan kuenta anual audita (“gecontroleerde jaarrekening”) i tambe raporta riba funshonamentu di “Corporate Governance”.

 

Den e Rapòrt di Maneho Finansiero di Pais Kòrsou di Yüni 2019 (FMR Yüni 2019), anekso (“bijlage”) 4, mi a tuma nota ku te ainda tin diferente fundashonnan ku ta entidatnan di Pais Kòrsou i ku ta kai bou di portafolio di Minister di Desaroyo Ekonómiko , ku te ainda tin kuentanan anual pendiente pa entrega te ku aña 2017 na Gobièrnu di Kòrsou. A base di Rapòrt di Maneho Finansiero di Pais Kòrsou di Yüni 2019 (FMR Yüni 2019), anekso (“bijlage”) 4 i tambe kumplimentu ku e lei di Corporate Governance, mi ta aserka Minister di Desaroyo Ekonómiko ku e siguiente preguntanan, hasiendo uso di mi derecho komo parlamentario pa hasi pregunta konforme artíkulo 57 di Areglo di Estado di Kòrsou (nos lei máksimo) i tambe artíkulo 96 di Reglamentu di Orden di Parlamento di Kòrsou:

 

Curaçao Tourism Development Foundation 

1. Kiko ta e motibunan konkreto ku Curaçao Tourism Development Foundation segun e FMR Yüni 2019 Anekso 4, no a entrega su kuenta anual audita di aña nan 2014 te ku aña 2017 na Gobièrnu di Kòrsou?, 2. Ki dia Parlamento di Kòrsou lo risibí di Gobièrnu di Kòrsou e kuenta anual audita di aña nan 2014 te ku aña 2017 di Curaçao Tourism Development Foundation?

 

Stichting Korporashon pa desaroyo di Kòrsou (KORPODEKO) 

1. Kiko ta e motibunan konkreto ku Stichting Korporashon pa desaroyo di Kòrsou (KORPODEKO) segun e FMR Yüni 2019 Anekso 4, no a entrega su kuenta anual audita di añanan 2013 te ku 2017 na Gobièrnu di Kòrsou?, 2. Ki dia Parlamento di Kòrsou lo risibí di Gobièrnu di Kòrsou e kuentanan anual audita di añanan 2013 te ku 2017 audita di Stichting Korporashon pa desaroyo di Kòrsou (KORPODEKO)?. 

 

Tambe mi tabata tin e siguiente petishonnan:

1. Petishon pa risibí e kuenta anual 2017 di Curaçao Investment and Export Development Foundation (CINEX); 2. Petishon pa risibí e kuenta anual 2017 di Stichting voor de Economische Ontwikkeling i 3. Petishon pa risibí e kuenta anual 2017 di Fundashon Marshe. 

 

Atentamente,

 

Curtley Obispo

Parlamentario pa Kòrsou

PAR