Ministerio di Desaroyo Ekonómiko ta elogiá tremendo trabou di Curaçao Tourist Board

Ministerio di Desaroyo Ekonómiko ta elogiá tremendo trabou di

Curaçao Tourist Board

Gran promoshon di nos isla durante programa ‘1st Look’ riba popular kanal NBC 

 

Willemstad 21 di òktober 2019  ̶  Curaçao Tourist Board ku su meta pa sigui promové nos isla komo destinashon turístiko a logra otro kolaborashon eksitoso ku e konosido figura públiko merikano, Johnny Devenanzio, mihó konosí komo ‘Johnny Bananas’. Su programa ‘1st Look’ na e popular kadena NBC ta hala miónes di televidente tur siman, i CTB a hasi uso di esaki pa netamente logra e promoshon deseá pa nos isla. 

Durante un bishita na nos isla, kortesia di CTB, e personahe aki a bishitá vários sitionan popular i di interes pa turistanan, i a kubri esaki di forma ekstensivo pa su programa ku a ser transmití fin di siman tras di lomba na e popular kanal. Tambe riba medionan sosial, Kòrsou a haña un tremendo merkadeo danki na e kolaborashon aki ku MEO sigur ta aploudí. 

E inisiativa aki di nos ofisina di turismo ta forma parti di e trabounan inkansabel ku ta ser hasí pa ku e implementashon di e master plan pa por atraé mas turismo pa nos isla. “Ku esaki nos ta mira un biaha mas e importansia pa sigui enfoká riba e pilar ekonómiko esensial aki ku ta den kresementu i ku ta di gran aporte pa nos ekonomia. Huntu nos ta traha ku mesun meta, pues ku tur nanishi den e mesun direkshon pa mustra e partinan positivo di nos isla p’asina nos krese e kantidat di bishitante. Mi ta sumamente orguyoso di e tim di CTB pa e tremendo trabou aki”, tabata palabranan di nos Minister di Desaroyo Ekonómiko, Giselle Mc William.

CTB i MEO sigur lo sigui traha huntu riba e lokual nos ke logra pa nos isla, ku ta di hasié muchu mas grandi i konosí komo destinashon turístiko. P’esei awor mas ku nunka ta di sumo importansia pa nos keda uní den nos meta i duna nos aporte pa esaki. 

Pa tur esnan ku no a logra sintonisá e programa, por bishitá a página sosial di Facebook di Curaçao Tourist Board pa mira e video. Kòrda ‘Like & Share’ e video paso nos kada unu por kontribuí pa sigui promové nos dushi isla. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: