Lansamentu Videoclip VivaKids Recycleband.

 

VIVAKIDS KU HOPI ORGUYO TA LANSA VIDIOKLEP NOBO PA E KANSION ‘MI KE WAK BO BAILA’

 

WILLEMSTAD- VivaKids Recycleband ta un proyekto piloto ku Omar Sling a kuminsá na aña 2017 kaminda el a disidí na invertí tempu i amor pa asina siña un grupo di mucha e balor di arte i músika i alabes e importansia di resiklahe i kuida nos planeta. Ku Lansamentu di e vidioklep nobo aki VivaKids ke demostrá mundu kuantu bo por logra hasi ku tiki medio pero tambe ilustrá e poder den arte i músika pa restourá i trese hende huntu.

Nos muchanan di VivaKids recycleband ta bini huntu tur djasabra den atelier di Omar Sling. Akinan, di forma boluntario Omar i Team Viva ta invertí tempu i amor pa siña e muchanan pa medio di weganan, músika, arte, harmonia i tin bia asta di forma un poko kómiko kuantu kos nan por hasi porehèmpel ku un simpel bleki bashí.
VivaKids ta konsistí na e momentunan aki di dos grupo; nos tin VivaKids Ruman Grandi kual ta e hóbennan di VivaKids ku bo por mira durante presentashonnan pero tambe tin VivaKids Ruman Chikí ku a nase e aña aki i ku guiansa i eksperiensia di esnan den Ruman Grandi huntu ku Team Viva esnan di Ruman Chikí tambe lo mester krese i desaroyá nan talentonan a lo máksimo.
Mas ku tur kos VivaKids ke empoderá e muchanan aki pa ta adultonan kapas den futuro. Dunando nan tur e hèrmèntnan nesesario pa asina nan por hasi uso optimal di nan talento i usa esaki pa bon. Tur esaki ku énfasis riba e parti di resiklahe kaminda kada bes di nobo nan ta siña ku bo por logra kosnan bunita tin bia ku tiki medio.
Durante kada aña ta tèst e konosementu i abilidat di e integrantenan di VivaKids dor di traha i siña toka un kantika nobo, graba esaki den un studio di produkshon i traha un vidioklep.

E kansion ‘Mi Ke Wak Bo Baila’ ta un cover di e artista estadounidende Meghan Trainor su kansion ‘Better when I’m dancing”. E videoklep ta ilustrá un famia humilde ku a vense opstakulo i bareranan pa medio di músika. Nos ta kere ku músika i arte ta trese hende huntu i ta kultivá alegria den bida di hende. Meskos tambe músika i arte ta un medisina masha efektívo pa nos alma.
Ku e kansion aki VivaKids kier enkurashá otro mucha i hóbennan pero tambe kualke adulto ku mester di esaki, pa lanta para meimei di kualke sirkunstansia ku siguransa den bo abilidatnan, tuma kurashi i mustra e mundu e kandela di positivismo ku ta brota den bo.

VivaKids no ke laga e oportunidat aki pasa bai sin ekstendé un gradisimentu di kurason na kada un di e Amigunan di Viva ku a kere den nos muchanan i tambe den e proyekto aki i a kontribuí di un forma òf otro pa asina yuda nos logra tur loke nos a produsí te ku awor. Mas ku klaro e meta ta, pa sigui desaroyá, sigui krese i sigui invertí den e muchanan aki pa mañan nan ta bon ekipá. Pues si bo tambe ta kere ku bo por aportá na kresementu di e simia aki i bo ke bira un Amigu di Viva laga nos sa na 511-8202 òf 692-9533 i nos lo splikabo kon bo tambe por bira nos amigu. 

Un i tur por disfruta di e vidioklep nobo di “Mi Ke Wak Bo Baila” tantu riba Youtube komo riba Facebook di VivaKids Recycleband. Like e vidioklep i laga bo komentario atras. Tambe sigui kompartí esaki mas ku klaro i mustra asina bo aporte na e gran proyekto aki.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: