MP ta kondená tur tipo di violensia kontra di hende muhé i proyekto di lei ta na kaminda
MP ta kondená tur tipo di violensia kontra di hende muhé i proyekto di lei ta na kaminda
Apénas un luna promé ku dia 25 di novèmber próksimo, dia internashonal pa eliminashon di violensia kontra di hende muhé, Kòrsou ta konfrontá ku otro morto di un hende muhé a konsekuensia di violensia relashonal.
Un kaso lamentabel lagando tres yu atras sin mama ku tur su konsekuensianan.
E akto brutal aki mas ku klaro a sakudí nos komunidat.
No opstante e echo ku tin leinan vigente pa atendé ku e tipo di delitunan aki tin nesesidat na leinan di prevenshon.
E proyekto di lei, “Ordenansa No Mas” ta bou di evaluashon di ekspertonan.
Ku e lei aki outoridatnan lo haña un instrumento pa traha kuné pa asina saka e persona, for di ken e violensia òf menasa di violensia ta sali, for di kas promé ku e kometé un akto kastigabel.
Di e forma aki por skapa bida i tambe stòp e violensia pa e miembronan di famia.
E lei aki ta un di e instrumentonan den prevenshon di violensia doméstiko òf relashonal. Banda di esaki nos mester traha di un forma integral kontra di violensia doméstiko, maltrato di mucha i abuso seksual di mucha den kuadro di prevenshon.
Kada un bida di hende muhé pèrdí ta di mas.
Manera e proyekto di ordenansa ta bisa ‘No mas!
Marilyn Moses
Movementu Progresivo
