Prome Minister Evelyn Wever-Croes: CONTRARIO NA PONENCIANAN DI OPOSICION, RAPPORT CARMABI TA RICIBIENDO ATENCION DEBIDO DI GOBIERNO.

 

Prome Minister Evelyn Wever-Croes:

 

CONTRARIO NA PONENCIANAN DI OPOSICION, RAPPORT CARMABI TA RICIBIENDO ATENCION DEBIDO DI GOBIERNO.

 

ORANJESTAD – Dialuna 31 di januari  Prome Minister Evelyn Wever – Croes tabata den reunion di Parlamento pa atende cu e tema: “Rapport CARMABI” Coral Reefs Baseline Study for Aruba 2019”. Contestando pregunta di miembronan di Parlamento, Premier Wever – Croes a splica di trabounan realisa den cuadro di e rapport desde cu el a ricibi esaki. 

 

Premier Wever – Croes inicia dunando splicacion cu e rapport Carmabi a yega na su conocemento na december 2020 y dibiaha a pidi pa ricibi un presentacion di e expertonan. E periodo aki Prome Minister tabata encarga cu Ministerio di Infrastructura y Medio Ambiente.  

 

PROME ENCUENTRO/PRESENTACION

E presentacion a tuma luga 20 di januari 2021 door di conseheronan/ expertonan di Carmabi.  Segun Prome Minister, e presentacion tabata hopi impresionante y e conclusion tabata cu tin areanan di preocupacion. ‘Mester bisa cu e rapport no ta devastador riba tur area, pero ta pidi atencion di Gobierno riba algun area.’ 

 

AREANAN DI ATENCION/PRECUPACION SEGUN E RAPPORT

Pa loke ta trata pisca, e rapport a indica cu Aruba su awanan tin cantidad y calidad di pisca cu ta considera bon. Pa loke ta e coralnan, e resultado di e investigacion tabata: mas o menos, pues e mester mas atencion. Y pa locual ta trata bacterianan den e awa esey ta punto di preocupcion y mester traha riba dje.

Prome Minister su pregunta na e expertonan tabata: si ta laat pa atende cu e puntonan di preocupacion, pa cual nan a bisa cu no ta laat,  pero mester actua y no por pospone mas. 

 

DI DOS ENCUENTRO  

Prome Minister a sigui splica cu mesora a traha di dos afspraak cu e expertonan, pero e biaha aki cu e Ministernan encarga cu diferente area di e problematicanan menciona den e rapport. 

Minster di Finanzas, pasobra tur solucion ta costa placa, pues ta importante pa e Minister tambe ta na altura di kico e rapport ta encera. Minister di Turismo y di Salubridad pasobra ambos sector ta afecta den e caso aki. Minister di Husticia pa e temanan di ley cu mester pasa y Minister cu tabata encarga cu Sector Primario e tempo ey considerando e situacionan cu calidad di coralnan. 

E reunion aki a tuma luga dia 9 di februari 2021, Prome Minister a indica.

 

INSTITUCION DI COMISION DI EXPERTO PA ATENDE CU PRECUPACIONANNAN 

A base di e reunion aki, Prome Minister Wever – Croes a tuma e decision pa propone den Conseho di Minister pa introduci un comision consistendiendo di diferente departamento. Pa hunto bin cu un solucion a termino cortico, a termino mediano y a termino largo, pa atende cu e puntonan di atencion di e rapport. E comision tabata encarga tambe pa presenta e costo envolvi cu e solucionnan proponi. ‘E biaha aki e conseheronan a pidi pa enfoca riba erosion di e beachnan y importancia di nos rifnan pasobra e rifnan ta crea santo, cu ta crea beachnan y consecuentemente ta crea nos economia.’ Prome Minister a sigui splica cu e conseheronan a pidi tambe a pesar cu a score positivo pa loke ta cantidad y calidad di pisca), pa pone mas atencion pa proteha e ‘Parrot fish’ pasobra nan ta yuda mantene e rifnan. 

 

‘Mi a bay Conseho di Minister dia 12 di februari cu e proposicion pa bin cu e comision, y e comision a wordo lanta den un Ministeriele Beschikking (MB) 15 di februari.’

 A pone e comision den man di liderazgo profesional y capacita di Departamento di Naturalesa y Medio Ambiente (DNM), cu hunto cu otro departamentonan, a traha riba algun sugerencia. 

Mirando e periodo di Covid, cu Gobierno a bira demisionario mas o menos 1 luna despues, y teniendo na cuenta e diferente desaroyonan cu tabatin, a haya un conseho/sugerencia na augustus. Unabes cu formacion di Gobierno a tuma luga na september, a traspasa esaki na Minister Ursell Arends cu ta esun encarga cu Naturalesa. 

Prome Minister Wever – Croes a enfatisa cu e tin tur confiansa cu e proposicionnan aki a wordo pasa den man capacita y adecua y tin tur confiansa cu den man di Minister Arends hunto cu e departamentonan encarga, lo por ehecuta e trabounan necesario. 

 

Prome Minister Wever – Croes a splica den Parlamento cu mirando e delicades di e tema, a tuma e decision pa no publica e rapport na e momento cu a haye, pendiente di un plan (‘plan van aanpak’) cu ta splica con lo atende cu e retonan y tambe con lo financia e solucionnan. A tuma e decision aki pa no trece panico innecesario. Lamentablemente oposicion a haci cune netamente locual cu kier a evita.

 

Pa finalisa Prome Minister a enfatisa cu Gobierno ta atendiendo cu e tema a pesar di espacio financiero limita y mientras cu ta den pandemia y crisis den diferente sector. 

Alabes ta sigura cu e rapport tin tur atencion di e Minister encarga cu naturalesa y ta ricibiendo e atencion debido.