Ministerio SOAW, Universidat di Kòrsou i VUmc di Amsterdam a tene workshop pa prepará e petishon pa proyekto tokante relashon di estilo di bida ku problemanan sosial 

Komunikado pa prensa di Ministerio SOAW i Minister Ing. H. Koeiman

Ministerio SOAW, Universidat di Kòrsou i VUmc di Amsterdam a tene workshop pa prepará e petishon pa proyekto tokante relashon di estilo di bida ku problemanan sosial 

 WILLEMSTAD – Djasabra 26 di Òktober a tuma lugá un workshop na Universidat di Kòrsou durante kua a trata e tema ‘relashon entre estilo di bida i problemanan sosial’. E workshop ta  parti di e preparashon di un petishon na NWO pa un proyekto social. E ta trata di un proyecto intenso den kua Ministerio pa Desaroyo Sosial, Labor i Bienestar, ta uni forsa ku Universidat di Kòrsou, VUmc di Amsterdam, Profesor Dr. Bob Pinedo i otro partnernan, pa hasi investigashon i yega na resolushonnan relashoná ku e problematika di estilo di bida i problemanan sosial. Otro instansianan ku lo kolaborá den e proyekto aki ta; Fundashon Prevenshon i Universidat di Tilburg,

Minister Hensley Koeiman ta apoya e proyekto aki komo ku ta masha importante pa e yudansa sosial tin base den siensia. 

Riba e mainta aki na Universidat Dr. Frumencio Da Costa Gomez tabata presente Minister Hensley Koeiman i Dr. Francis de Lanoy, Rector Magnificus di Universidat di Kòrsou. Seguidamente tabatin presentashon di e dekano Moira de Castro, di e fakultat di Siensia di Komunidat i Komportashon, bou di kua e proyekto ta kai. Despues ku sra. dekano De Castro a kompartí informashon di loke e fakultat en kuestion su responsabilidat ta, a pasa palabra pa Dr. Jacqueline Hugtenburg, profesor asosiá na VUmc di Amsterdam, kende a logra haña fondo pa hasi e investigashon. 

E diskushonan ku a wordu presidiá pa dekano sra. De Castro a trese hopi idea nobo pa e petishon. 

Minister Hensley Koeiman a bisa mas aleu ku e ministerio lo duna sosten kompletu pa e proyekto por bira realidat i ku e ta di opinion ku ta unu di sumo importansia pa yega na resolushonnan ku mester aportá na bienestar sosial duradero di nos komunidat. 

# # #

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: