Global Entrepreneurship Week ta anunsiá un programa variá ku énfasis riba inklushon pa 2019

Global Entrepreneurship Week ta anunsiá un programa variá ku énfasis riba inklushon pa 2019

WILLEMSTAD – Djamars anochi a tuma lugá, loke e organisadónan a yama un kick-off conference’, previo na e siman krusial pa yega na Global Entrepreneurship Week (GEW) 2019. E aña aki ‘siman empresarial’ lo ser selebrá pa di sinku aña konsekutivona Kòrsou i  lo tuma lugá den e siman di 18 pa 24 di Novèmber. Durante di e enkuentro ku prensa, partnernan i invitadonan spesial, e komité organisádo a pasa den e programa pa 2019. E programa ta unu hopi variá ku partisipashon di mas tantu partner ku tabata e kaso e aña anterior. 

“Sra. Elgenia Pieternella, kende ta presidente di Fundashon Negoshi Pikiña, ku tin e lisensia pa organisá Global Entrepreneurship Week (GEW) pa e islanan di Karibe Hulandes a bisa di ta sumamente kontentu ku partisipashon di asina tantu organisashon i individuo na GEW Curaçao pa aña 2019. “Na komienso di e aña aki nos a ser sorprendé na  e konferensia mundial organisá pa Global Entrepreneurship Network (GEN), ku e grato anunsio ku Kòrsou a gana e premio kodisiá komo ‘e país katalisadó di mas tantu partner per capita. Kòrsou a gana e premio aki entre 170 pais afiliá na e organisashon mama ku ta GEN. Esei naturlamente a duna nos un estímulo pa sigui ku e trabou ku nos a bin ta hasi i nos a ‘reach out’ na mas partner pa asina pone Kòrsou ainda mas fuerte riba mapa mundial komo un pais ku un teritorio chikí, pero di kua su komunidat por hasi kosnan grandi,” sra. Pieternella a bisa. 

“Nos enfoke ta unu di inklushon”, e presidente di GEW Curaçao a sigui bisa. “Na Kòrsou nos tin hopi organisashon ku hinter aña ta hasi trabou emprendedóvalioso pa adelanto di nos pais. Basta di nan a partner ku nos ya pa algun aña i pa 2019 hopi partner nobo a djòin e GEW Curaçao. Meta di e ‘siman’ ta pa tira lus riba importansia di é empresario, pa insentivá ideanan nobo di negoshi, stimulá kolaborashon entre emprededónan, krea mas kupo di trabou i desaroyá nos ekonomia. Nos lema pa e aña aki ta: Ban krea kambio a base di inovashon i invershon.”

Durante di e enkuentro sra. Pieternella, na nòmber di e komité organisadó, a otorgá un ‘pin’ na Minister pa Desaroyo Ekonómiko, sra. Gisella McWilliam, kende na su turno a elogiá e bon trabou ku e organisadónan di GEW Kòrsou a bin ta hasi. Alabes Minister McWilliam a enfatisá riba e importansia ku empresarionan tin pa mantené i amplio kupo di trabou i stimulá ekonomia di nos país.  

Pa e aña aki, meskos ku tabata e kaso den añanan anterior, e komité organisadó a invitá un orador internashonal. “Nos por informá awe ku nos tin un akuerdo ku sra. Swati Mandela, kende ta nieta di Nelson i Winnie Mandela, pa e ta nos ‘orador internashonal’ na un sena ku nos lo tene djaweps anochi  dia 21 di Novèmber na Renaissance Hotel and Casino. Banda di ta nieta di e legendario ‘nobel prize winner’ Nelson Mandela, sra. Swati mes ta un eksitoso empresario i humanitario. E ta embahador pa su país, Sur Africa, den diferente organisashon di renombre mundial. E ta ser pidí hinter aña na paisnan rònt mundu pa e hasi presentashon i kompartí su profundo mensahena. El a sigui mantené bibu e herensia profundo di e famia Mandela, i nos por ta orguyoso di por tin’é algun dia komo nos invitado spesial aki na Kòrsou i tambe Boneiru.” 

Seguidamente a hiba palabra diferente persona di organisashonnan i personanan ku ta ehekutando proyektonan ku lo kulminá den e siman di 18 pa 24 di Oktober. Organisashonnan ku tabatin representante presente ku a kompart;i informashon di nan proyekto ku ta forma parti di Global Entrepreneurship Week ta, The Business Brainer, Caribbean Education and Finance Group, Banko Sentral di Kòrsou i Sint Maarten, Kámara di Komèrsio i Industria di Kòrsou, CHATA, Ministerio pa Desaroyo Ekonómiko (MEO), Curaçao Innovation and Technology Institute (CiTi) i I Am Made In Curaçao. 

Den e mesun rosea a menshon di instansianan partner ku no por tabata presente pero ku lo duna un aporte valioso manera Maduro and Curiel’s Bank, Mensing’s Caminada, Soul Garden, Share 2 Uplift, Cinex, Rooms Katholiek Schoolbestuur, Radulphus College, International School Curaçao, Caribbean Habanos Days, Evento Curaçao, ToastMasters, Mayor i Yu i Be-Smart. Pa mas detaye di e ‘siman empresarial’ por bishitá www.gewcuracao.com i sigui postings riba e página di Facebook i Instagram di e organisashon.

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: