Radulphus College a bai ku ámbos premio CBCS ta presentá resultado di Best Economic Research Award 2025

 

Radulphus College a bai ku ámbos premio

CBCS ta presentá resultado di Best Economic Research Award 2025

WILLEMSTAD/PHILIPSBURG – Dia 26 di yüni 2025, Centrale Bank van Curaçao en Sint Maarten(CBCS) a presentá e premio Best Economic Research Award na e ganadónan di e edishon 2025. Alumno di Kòrsou i Sint Maarten na nivel di HAVO i VWO por a partisipá na e kompetensia akí. Pa di dos aña, e ganadónan di tantu HAVO komo VWO ta alumno di Radulphus College. E aña akí, e ganadónan na nivel di HAVO ta Girvey Gosepa i Zia-Marie Martel, i Fabian Sicking i Ricardo Winkel na nivel di VWO.
CBCS ta organisá e kompetensia anual akí ku e meta di stimulá investigashon ekonómiko bou di studiante, spesialmente relashoná ku ekonomia di Kòrsou i di Sint Maarten. Na inisio di e kompetensia, CBCS a bishitá vários skol pa duna informashon útil i splika e reglanan. Na tur, CBCS a risibí ocho werkstuk: kuater di HAVO i kuater di VWO, riba diferente tema, manera e riesgonan di servisio bankario no supervisá, operashon bankario internashonal, invershon lokal, protekshon di konsumidó i florin karibense.
Manera den e añanan anterior, un pènel di eksperto ku konosementu amplio riba tereno
ekonómiko, fiskal i monetario a evaluá e obranan presentá. A evaluá nan metodologia di
investigashon, originalidat i kreatividat, abilidat di skirbi, lay-out i relevansia, teniendo kuenta ku nivel akadémiko di kada kategoria. Na e seremonia di entrega dia 26 di yüni, e ganadónan a hasi un presentashon breve di nan investigashon, siguí pa un seshon di pregunta i algun komentario
balioso di e huesnan komo feedback, pa despues nan risibí nan trofeo. E ganadónan na nivel di HAVO i VWO a risibí un premio di Cg 2.500, miéntras ku nan skol a risibí un premio kèsh di Cg 5.000 pa kada kategoria.
Girvey Gosepa i Zia-Marie Martel (HAVO) a risibí e Best Economic Research Award pa nan ‘profielwerkstuk’ titulá ‘De macht van sociale media op bedrijven’, miéntras ku Fabian Sicking i Ricardo Winkel a entregá e werkstuk titulá ‘International banking en online gaming’. CBCS ta deseá tur e partisipantenan hopi éksito mas, tantu den nan estudio komo den nan karera profeshonal.
E kompetensia na nivel di bachelor i master ta andando ainda. Aunke e último fecha pa entrega di werkstuk ta tras di lomba, e intenshon ta pa revelá e ganadónan den luna di yüli, siguí mesora pa un seremonia similar. E premio na nivel di bachelor ta Cg 5.000, i na nivel di master, Cg 7.500.

Willemstad, 27 di yüni 2025
CENTRALE BANK VAN CURAÇAO EN SINT MAARTEN