Krus di Mèrito 2025
Enseñansa, Siensia, Kultura & Deporte
Krus di Mèrito 2025
Publiká riba 27 Yüni 2025
Kòrsou tin sinku (5) Nominado pa risibí Krus di Mérito riba 2 di yüli próksimo
Willemstad – Riba djadumingu 22 di yüni 2025 tur 5 Nominado di Krus di Mérito a bisa si riba e pregunta di Minister enkargá ku kultura sr. Sithree van Heydoorn, si nan ta aseptá e Krus di Mérito. Sektor di Kultura i Deporte di e Ministerio di Enseñansa, Siensia, Kultura i Deporte, a organisá e seremonia ofisial di aseptashon akí na kua kada Nominado por a asistí akompañá ku nan famia.
Krus di Mérito ta un rekonosementu ofisial ku Gobièrnu ta duna na e siudadano pa su entrega personal i kontribushon eksepshonal ku a hasi un impakto positivo riba desaroyo di nos komunidat i nos nashon. Tur aña, riba 2 di yüli, Dia di Bandera, Gobièrnu di Kòrsou ta hasi entrega di medaya akí na e siudadano nan ku ta bini na remarke pa risibí esaki. E seremonia di aseptashon ta un parti mashá esensial den e proseso. Tur nominado mester ofisialmente aseptá e proposishon pa keda kondekorá. E seremonia di aseptashon ofisial akí a tuma lugá den un ambiente inspirativo na Hotèl Rennassaince den presensia di Presidente di Parlamento, Parlamentarionan, Ministernan, famia di tur nominado i otro invitadonan.
E Nominadonan pa Krus di Mérito 2025 ta :
- Señora Ella Zacarias Snijders pa su aktonan meritorio relashoná ku aktividatnan sosial komunitario.
- Señora Yvette Elisabeth Rojer pa su aktonan relashoná ku deporte.
- Señor Harold Eustaquio Corasol pa su aktonan meritorio relashoná ku aktividatnan sosial i edukashonal.
- Señor Ruthsel Gregorio Martina pa su aktonan meritorio relashoná ku aktividatnan sosial i deportivo.
- Señor Romeo Raymond Heije pa su aktonan meritorio relashoná ku aktividatnan sosial i musikal.
Gobièrnu di Kòrsou ta yama nos 5 nominadonan pa Krus di Mérito, masha Pabien i ta gradisí nan kada unu pa nan trabounan meritorio.
**Un deskripshon amplio di e nominadonan pa risibí Krus di Mérito klik aki: Biografia Nominadonan pa Krus di Mérito 2025
Pa mas potrèt bishitá: Facebook di Ministerio di ESKD
