E biaha aki ku bista riba e aspekto di maneho finansiero i nutrishon “Stimulashon Trempan den Bario”: duna kada florin un bon destino i kome salú!

E biaha aki ku bista riba e aspekto di maneho finansiero i nutrishon
“Stimulashon Trempan den Bario”: duna kada florin un bon destino i kome salú!

Willemstad –Fundashon Sentro pa Inovashon i Guia Edukashonal (SIGE) a klousurá luna di òktober ku kuater seshon hopi interesante den kuadro di e tanda nobo di Siklo di Informashon Aminta Sprockel Stimulashon Trempan den Bario. E biaha aki e charlanan a toka e temanan “Maneho finansiero Responsabel”, “Nutrishon di mucha di 0 pa 4 aña” i “Nutrishon di mayor”. E mensahe prinsipal durante e tanda kompletu tabata pa duna kada florin un bon destino i kome salú. E lema aki ta aplikabel na momentu ku un hende ta kubri su gastunan mensual pero tambe na momentu ku ta hasi kompra di kuminda pa kas. Ta mas rekomendabel por ehèmpel pa invertí den produktonan ku ta kontribuí na salú di tantu un mucha i mayor ya ku esaki sigur lo tin su benefisionan duradero den hopi sentido. Durante e seshonnan na Sentro di Bario Koraal Specht e 25 partisipantenan a risibí informashon balioso, evaluando nan propio maneho finansiero i nivel di nutrishon na kas, den un ambiente ameno ku diskushonnan sano.

Oradó sra. Jane Alberto a duna charla tokante e 2 tópikonan “Maneho Finansiero Responsabel: Traha presupuesto balansá” i ”Maneho Finansiero Responsabel: Kumpli ku presupuesto balansá”. El a splika ku kada desishon ku bo tuma di kompra òf spar tin su konsekuensianan finansiero. Alabes, el a splika e konsepto di gasta a base di un presupuesto kual outomátikamente lo yuda stimulá sparmentu. Sparmentu ta sumamente importante i ta duna pas mental na momentu ku situashonnan inesperá surgi; kada florin di spar por hasi un diferensia den tempu di nesesidat. Ta sea bo ta skohe pa biba konforme bo forsa òf for di bo forsa.

Na su turno, sra. Sherree Acosta a trata e dos tópikonan “Importansia di Nutrishon pa Mayor” i “Importansia di Nutrishon pa mucha di 0 pa 4 aña”. Awendia tin mayor ta haña difísil pa invertí e kantidat di tempu nesesario pa prepará un kuminda balansá tres bia pa dia pa un mucha di 0 pa 4 aña. Hopi bes ta skohe pa e opshon mas fásil, basta tantu e mucha komo e mayor yena e stoma. Sinembargo, desaroyo éksitoso di un mucha ta rekerí pa e haña tur su vitamina i mineralnan, i mayornan mester komportá di forma ehemplar pa e muchanan den e área aki. Sra. Acosta a duna diferente tep pa fásilitá mayornan. Por ehèmpel dor di traha menu un bia pa siman den wikènt e mayor por skapa e tempu di para pensa kiko ta bai kushiná riba dianan ku ta drùk den siman. Esaki tin benefisio pa e aspekto finansiero tambe mirando ku e mayor ta hasi kompra mas dirigí i a base di e menu. 

Na final di e siklo partisipantenan tabata hopi kontentu i bon konsiente di e importansia di maneho finansiero responsabel i nutrishon balansá pa tantu mayor komo mucha. Ku orguyo nan a tuma nan sertifikado di partisipashon i a gradesí representantenan di SIGE pa e bon trabou di konsientisashon.

Esaki ta un di e tantisimo formanan ku Fundashon SIGE ta dunando su granito na desaroyo di nos dushi Kòrsou, invertiendo amor, konosementu i sabiduria atkerí den edukashon di nos muchanan, kende ta e futuro di mayan. Pa mas informashon por tuma kontakto ku Fundashon SIGE na numbernan di telefòn 747-2700 i 738-6570 òf subi nos website www.sige.cw.