Banco di Caribe ta sostené eskritornan lokal ku publikashon di nan buki den Siman di Ban Lesa 2019

Banco di Caribe ta sostené eskritornan lokal ku publikashon di nan buki den Siman di Ban Lesa 2019

 

WILLEMSTAD- OKT 2019:  Muchanan a disfrutá inmensamente di Siman di Ban Lesa 2019 i Banco di Caribe ta masha kontentu di por a duna un kontribushon. Sostené proyektonan ku ta enfoká riba desaroyo di mucha i hóben semper ta un di e prioridatnan pa Banco di Caribe. Ta hustamente den e kuadro aki a sostené publikashon di 3 buki pa mucha i hóben den diferente kategoria di edat.

 

Tres buki di eskritornan lokal

E promé buki ku Banco di Caribe a patrosiná ta titulá ‘Nina ta Stima’ skibí pa Sra. Mercée Doran. E buki aki ta pa muchanan entre 0 ku 5 aña di edat i ta un buki masha dibertido pa mayornan lesa pa nan yunan. Tambe a sostené publikashon di e buki ‘Ban keiru i deskubrí Kòrsou’ ku ta e buki ofisial di Siman di Ban Lesa 2019. E buki aki ta spesialmente pa muchanan entre 4 ku 12 aña di edat i ta kontené diferente kuenta i poesia skibí pa diferente eskritor lokal. Finalmente Banco di Caribe a patrosiná un buki pa tiner ku ya ta bishitando skol sekundario. Esaki ta un buki na spañó titulá ‘La Sangre Llama’ skibí pa Sra. Loeki Morales. 

 

Un regalu di Banco di Caribe

Pa konkluí e Siman di Ban Lesa 2019, djarason último Banco di Caribe huntu ku su maskota ‘Tesorito’ a opsekiá yu di tur kolega, entre 0 ku 12 aña di edat, e buki ‘Ban keiru i deskubrí Kòrsou’. Tin diferente manera pa engrandesé mundu di un mucha, stimul’é pa lesa un buki edukativo i dibertido ta un di nan. “Na momentu ku un mucha habri un buki, e’la habri su mente.”

 

Banco di Caribe ta mashá orguyoso di por a sostené e proyekto di Biblioteka Nashonal di Kòrsou i den esaki tambe e publikashon di 3 buki. Ta invitá mayornan pa stimulá nan yunan pa lesa mas ku ta posibel, esaki tin benefisionan inkomparabel pa e mucha òf hóben su desaroyo komo futuro profeshonal. 

 

Riba fotonan athunto un impreshon di diferente aktividat di Banco di Caribe den e Siman di Ban Lesa 2019.

 

 

This site uses Akismet to reduce spam. Learn how your comment data is processed.

%d bloggers like this: