Nesesidat urgente pa instalá fasilidatnan sanitario públiko den Punda i Otrabanda

Nesesidat urgente pa instalá fasilidatnan sanitario públiko den Punda i Otrabanda

 

Apresiabel Minister Charles Cooper,

 

Suskrito, miembro di frakshon di Movementu Futuro Kòrsou den Parlamento di Kòrsou, Maria Nita, ta pidi bo atenshon pa lo siguiente. 

 

Mediante e karta aki, suskrito ta deseá di yama bo atenshon riba un problema ku ta bira kada dia mas evidente i urgente den sentro di Willemstad, spesialmente den Punda i Otrabanda. Esaki ta e akseso limitá na fasilidatnan sanitario públiko.

 

Diariamente, tantu residentenan komo turistanan ta frekuentá e área menshoná pa hasi nan kompranan, pa trabou òf pa rekreashon. Sinembargo, ainda falta un sistema kla, struktural i visibel di fasilidatnan sanitario públiko. Hopi negoshinan i restorantnan, di nan banda, no ta permití uso di nan fasilidatnan na persona ku no ta kliente, loke ta krea situashonnan difísil i, den algun kaso, inkómodo pa bishitantenan. 

 

E problemátika aki ta afektá na manera spesial personanan di edat avansá, esnan ku kondishonnan di salú, manera diabétis òf problema di kólòn, i tambe turistanan ku no ta familiar ku e área. E falta di bon indikashonnan i un mapa ku ta mustra na unda e fasilidatnan sanitario den sentro di siudat ta, ta hasi e situashon mas difísil. 

 

Hasiendo uso di artíkulo 96 di Reglamentu di Òrdu di Parlamento suskrito ta hasi e siguiente preguntanan: 

 

1. Tin aktualmente un plan di maneho pa fasilidatnan sanitario públiko pa Punda i Otrabanda? 

 

1. Gobièrnu por konsiderá pa desaroyá un ret di fasilidatnan sanitario públiko na lokalidatnan stratégiko den sentro di siudat? 

 

1. Gobièrnu ta dispuesto pa konsiderá implementashon di un sistema di kontribushon finansiero i personal kalifiká pa garantisá mantenementu adekuá di e fasilidatnan sanitario públiko eventualmente den koperashon ku empresanan den sentro di siudat?   

 

1. Te kon leu gobièrnu por instituí indikashonnan visual i digital pa medio di mapanan òf medionan sosial pa turista i residente por haña e fasilidatnan ku fasilidat?  

 

1. Di ki manera gobièrnu por garantisá ku personanan di edat avansá, esnan ku kondishonnan médiko òf ku limitashonnan físiko, tin akseso adekuá na e fasilidatnan sanitario públiko?   

 

Den bista ku mehoramentu di e fasilidatnan sanitario públiko den sentro di siudat no solamente lo kontribuí na bienestar di residente i turista, sino tambe lo elevá e eksperensia turístiko riba Kòrsou, suskrito ta konfia ku e problemátika aki lo wòrdu tratá ku e urgensia nesesario, ku e meta di yega na un solushon struktural i duradero.  

 

Suskrito ta apresiá si minister por duna kontesta riba e preguntanan hasi por eskrito. 

 

Atentamente, 

 

Maria Nita, 

Parlamentario pa

frakshon di MFK