Sanikolas ta yega Kòrsou dia 16 di novèmber awor! Fundashon pa nos muchanan debidamente a trese kambionan positivo den e fiesta akí.

Sanikolas ta yega Kòrsou dia 16 di novèmber awor!
Fundashon pa nos muchanan debidamente a trese kambionan positivo den e fiesta akí.

Preaparashonnan ta tumando lugá pa e aña akí atrobe nos muchanan huntu ku nan mayornan por selebrá e fiesta tan gusta di Sanikolas i su pietnan.
Un biaha mas e fiesta aki ta posibel danki na un kantidat grandi di spònser ku tur aña di nobo ta sostené e fiesta aki. KFC, Subway i Pizza hut, Landsloterij, CPA i KTK, Tele Curacao i TC-FM, DMO, Curacao Bevarage Botling, MCB, Mangusa Hypermarket, St. Johannes Bosco, Licores Maduro huntu ku hopi amigunan di Sanikolas.
Un fiesta ku nos di Fundashon Pa Nos Muchanan a bin ta organisá ya pa 13 aña i e aña aki kumpliendo 14 aña.
Durante e 13 aña nan tras di lomba nos fundashon a bin ta adaptá varios aspekto di e fiesta, mirando ku tin gruponan den nos komunidat ku no ta di akuerdo ku e historia ku tin tras di dje. Algun di e adaptashonnan ku nos organisashon a bin ta hasi ta entre otro kita e “roe“ kompletamente, pues niun piet no ta kana ku “roe” ni pa suta ni pa spanta muchanan. Spantamentu di mucha ta estriktamente prohibí. E sakunan di pita ku e pietnan ta kana kuné ta yená ku mangel i pepernootjes, pues bou di niun sirkunstansia no ta menasá ku lo hinka mucha den saku. E pietnan tin komo tarea entretené nos muchanan ku kanto, baile, akrobasia, músika i skèchnan grasioso. Ku esaki nan ta demostrá diferente talento ku nan tin i no ta aparentá komo esun bobo. Nos organisashon no ta usa e palabra “ Zwarte Piet”, serka nos tur ta simplemente Piet. Otro adaptashon ku nos organisashon a hasi for di aña 2012 ta krea e historia kaminda pietnan riba kaminda pa Kòrsou a pasa dor di un arko iris i nan a piki diferente kolo i a mantené esaki nan durante tur e añanan ku a sigui. Pues debidamente nos Fundashon a trese kambionan pa lòs e fiesta aki for di esun original ku nos a importá hopi aña pasa. I ku awor ela bira nos fiesta ku nos a adaptá i e ta forma parti di nos kultura.
E mucha ku ta gosa di e fiesta aki no ta para ketu na kolo den sentido di rasismo, mas bien e ta disfrutá di e alegria ku e fiesta ta trese i ta konsiente ku bon komportashon lo keda premia. Tambe e fiesta aki ta enkurashá otro muchanan pa nan komportashon ta mihó.

Pa loke ta trate e e aña aki, djasabra 16 di novèmber ta e dia ku Sanikolas lo yega Kòrsou huntu ku su mas ku 50 pietnan i e tema e aña aki ta Sirko. 8.00 e toubot di KTK ta drenta haf i Sint i  su pietnan lo baha na Matheywerf i riba kabai lo kana den un parada bai Plasa Brion. Den e parada tin diferente atrakshon, entrenan e grupo di baile di mucha Explotion dancers, pòpchinan disney, diferente aspekto di un sirko huntu ku e brasbènt Titanium.
Tanten ku e parada ta kana pa yega Plasa Brion lo tin un tremendo show di VivaKids ku ta kuminsá 8.15.
Ora Sanikolas i su pietnan yega Plasa Brion lo tin un show masha leuk mes hinká den otro bou di kordinashon di  BCpro kende nan ta Raychel Sambo i Ivan Felipa, huntu ku Dcat kolas bou di direkshon di Richenel Pito Doran i Sergie Beltran. Nan a skohé e  pietnan di mas talentoso i e tremendo brasbènt PCD pa huntu trese un show kaminda diferente talento di nos piet nan hóben lo bini dilanti.
Ora Sanikolas i su pietnan baha for di Plasa Brion nan ta krusa Emmabrug bai Punda. Pa di 3 aña konsekutivo DMO ta sòru pa den Punda tambe tur mucha i nan mayornan disfrutá di un dushi ambiente. Ora e parada baha brùg Emma e ta pasa den Breederstaat Punda, drenta Columbusstraat, despues Madurostraat direkshon pa Plasa Jojo Coreia.  Aki MCB huntu ku DMO ta sòru pa otro show masha leuk mes, yená ku talento di nos pietnan. Na Plaza Jojo Coreia un pre show, na enkargo di D’Art pa mucha a kuminsá for 10.30 wardando Sanikolas i su pietnan yega.
Ora e parti aki kaba e parada ta sigui, pasando den Heerenstraat, lora drenta Breedestraat pa bai drenta e diferente vehikulonan. E aña aki Sanikolas ta kore den un bunita Santa Fe di Crown outomotive.
E fiesta ta sigui mitar di 2 na KFC Sta Maria kaminda muchanan lo balia i gosa ku tur e pietnan i tin chèns pa muchanan saka potrèt ku Sanikolas i algun piet.
Mas atardi pa 4or e fiesta ta sigui den e area di mucha aya na Mangusa Hypermarket ku un tremendo show di Explotion dancers sigui despues pa otro show dushi di Sanikolas i su pietnan talentoso.
Pa 6or nos lo ta bèk den sentro di siudat kaminda tin e e aktividat Biba Willemstad organisá pa Nos Pais tv.
E aktividat aki ta kuminsá for di 4or i lo tèrminá 10or di anochi. Lo bai tin 2 barku di turista aden i e aktividat tin komo meta pa trese turistanan mas serka di e pueblo i pa asina nan disfrutá di algun aspekto manera arte, musika i partinan di nos kulturta.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: