Entrante 1 desèmber 2019 visa di tránsito pa Haitianonan ta drenta na vigor

Entrante 1 desèmber 2019 visa di tránsito pa Haitianonan ta drenta na vigor

Geplaatst op 7 Novèmber 2019 dor di Ministerio di Asuntunan General i Promé Minister

WILLEMSTAD – Entrante 1 di desèmber 2019, Haitianonan ku ta bishitá Kòrsou den tránsito tin mester di un visa di tránsito. Desde e momentu ei outoridatnan na aeropuerto Hato lo kontrolá tur personanan di nashonalidat Haitiano ku ta den tránsito, pa verifiká si nan ta den poseshon di un visa di tránsito. Si e biaheronan aki, ku ta yega for di Haiti, St. Maarten òf kualke otro pais, no tin e dokumentonan nesesario, nan no ta haña entrada pa Kòrsou. Es desir ku nan lo pèrdè nan buelo di konekshon. E visa di tránsito ta konta pa tur Haitiano ku tin intenshon pa keda ménos ku 48 ora na Kòrsou. Esnan ku no ta den tránsito mester di un visa Karibense.

E prosedura pa apliká pa un visa di tránsito ta idéntiko na e prosedura pa yega na un visa Karibense regular. Aplikashon pa un visa (di tránsito) por tuma lugá desde 3 luna promé ku e fecha di biahe, dor di bishitá ofisina di VFS Global na Petion-Ville, Haiti. Tambe por apliká ‘online’ pa un visa (di tránsito) dor di bishitá https://www.vfsglobal.com/dutchcaribbean/haiti/index.html. Gastunan mará na e visa aki ta € 35, teniendo na kuenta ku VFS Global por kobra un montante adishonal pa ku gastunan atministrativo. E petishon pa visa por tuma te ku 15 dia pa prosesá. Na momentu ku disidí di no otorgá un visa na un aplikadó, e persona aki por entregá un keho na Toelatingsorganisatie Curaçao. Pa mas informashon tokante dokumentashon ku mester entregá huntu ku e aplikashon, por bishitá https://consular.mfaservices.nl/caribbean-visa?lang=en.

Personanan di Haiti ku tin pensá di biaha via Kòrsou pa un otro destinashon despues di 1 di desèmber, pero ku ta kumpra nan pasashi promé ku e fecha aki sin por keda kla ku un visa di tránsito na tempu, por haña eksepshon kon tal ku nan por indiká di a hasi e esfuersonan nesesario pa yega na un visa. E periodo di transishon aki lo dura te ku 15 di desèmber 2019.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: