Durante e wega Kòrsou – Costa Rica Ban pa un públiko tur na Tshirt bèrdè number 22 Dunando un biaha mas honor na  Jarzinho Pieter

Durante e wega Kòrsou – Costa Rica
Ban pa un públiko tur na Tshirt bèrdè number 22
Dunando un biaha mas honor na  Jarzinho Pieter

Djaweps awor 14 di novèmber e di tres i último parti di e kampaña di T-shirt ku e grupo ‘Amigunan di Pieter’ a organisá pa rekoudá fondo pa e dos yunan di Jarzinho Pieter ta konkluí ora e ekipo di Kòrsou topa ku e ekipo di Costa Rica. E promé dos partinan di e kampaña unda a urgi tur hende pa bisti e T-shirt bèrdè tabata na yegada di e kurpa sin bida for di Haiti i tambe na entiero di Pieter. Esaki a logra. Awor ta urgi e públiko presente den stadion Ergilio Hato pa na e promé partido di futbòl di nos ekipo nashonal riba suela di Kòrsou aki masalmente bisti e T-shirt ku nr 22 riba dje.  Ban pa un públiko tur na T-shirt bèrdè pa no solamente apoyá nos selekshon nashonal pero tambe duna rekonosementu na e gran kiper ku lamentablemente no ta huntu ku nos mas.

Grupo ‘Amigunan di Pieter’ ta kontentu pa duna di konosé ku for di kuminsamentu di e kampaña te ku awe a bende mas ku 850 T-shirt. Un logro hopi bunita i ku ta duna e señal kla i raspá ku pueblo di Kòrsou a sa di sostené e kousa i ku e kiper di Vesta tabata un deportista hopi kerí den nos pueblo. Hasta ekiponan di Aruba, Bonaire i Hulanda a laga bestèl T-shirt komo homenahe na Pieter. Pa e wega di Kòrsou kontra di Costa Rica grupo ‘Amigunan di Pieter’ lo kier purba pa yega 1000 T-shirt bendí ya asina por sera un montante respetabel ku lo bai pa e yunan.

T-shirt nan por wòrdu kumprá pa 25 florin na ‘Mr & Ms Exclusive’ na e filial na Saliña of esun na Winston Churchillweg te ku 15 di novèmber. Despues di esei lo sera e kuenta, hasi e konteo final i sea e kampaña. Grupo ‘Amigunan di Pieter’ for di awor ta yama danki na tur esnan ku a kumpra un T-shirt di “Love Puru Papa” sosteniendo e kousa.