Frakshon di MFK ta felisitá pueblo di Kòrsou ku apertura di Hospital Nobo Gabinete Schotte ta e pioneronan ku a pone ku, awe Kòrsou por tin un Hospital Nobo

Frakshon di MFK ta felisitá pueblo di Kòrsou ku apertura di Hospital Nobo Gabinete Schotte ta e pioneronan ku a pone ku, awe Kòrsou por tin un Hospital Nobo

 

Pueblo di Kòrsou nos mester ta orguyoso ku nos por biba apertura di un hospital nobo ku lo mester bai kontribuí na bienestar di salu di pueblo di Kòrsou. Naturalmente nos ta manda palabranan di gradisimentu pa Obispado di Willemstad ku 164 aña pasa a kuminsá di un forma humilde ku St. Elizabeth Hospitaal, ku durante di añanan a krese i bira e hospital prinsipal di pueblo di Kòrsou.

 

Den periodo di gobernashon di gabinete Schotte i bou di maneho di Minister di Salubridat señora Jacinta Constancia a pone e tokenan definitivo pa bin ku un hospital nobo pa pueblo di Kòrsou. E diseño di Curaçao Medical Center ta un diseño ku a wòrdu krea bou di gobernashon di gabinete Schotte. Pa transparensia a enkargá SONA ku maneho di e proyekto aki i tambe a enkargá SONA ku eskoho di e kontratista ku mester bai konstruí e Hospital Nobo aki.

 

Un presupuesto bon hinka den otro i un tereno kla pa por kuminsá konstruí sin ningun opstákulo pa ku e konstrukshon, tabata parti di e plannan ku gabinete Schotte a pone kla pa kuminsá ku e konstrukshon.

 

Ta di lamentá ku gobièrnunan di turno a tuma desishonnan ku no solamente a trese tardansa den e konstrukshon, pero tambe ku e desishonnan aki a trese kuné un oumento drástiko di e presupuesto inisial. Mas lamentabel ta ku e oumento aki di miónes di florin mester wòrdu karga pa pueblo di Kòrsou. Ta p’esei nos frakshon ta para pa un Enkuesta Parlamentario.

 

Otro gobièrnunan a mira burakunan den hinter e konstrukshon aki di hospital nobo, pa a krea espasio pa enrikesé amigunan polítiko. Pa frakshon di MFK e último palabra no a wòrdu papia ainda pa loke ta trata e aspekto finansiero di konstrukshon di Hospital Nobo Otrabanda.

 

Partido MFK, miembronan i su frakshon den Parlamento ta sumamente kontentu pa e logro ku Kòrsou ta dispone di un hospital nobo i nos ta sumamente kontentu ku gabinete Schotte ta e pionero, ku awe nos tin un hospital nobo.

 

Pabien pueblo di Kòrsou, pabien na tur elenko médiko ku lo bai laborá den e Curaçao Medical Center i un danki di kurason na Obispado i tur ku durante di 164 aña a laborá i duna kuido na St. Elizabeth Hospital.

 

Komo eks Minister di salubridat, mi persona Jacinta Constancia ta sinti mi orguyoso ku mi por a duna mi kontribushon den konstrukshon di e hospital nobo aki i un danki na eks Minister Presidente Gerrit Schotte pa e aporte ku e tambe a duna pa awe nos pueblo di Kòrsou por tin un Hospital Nobo.

 

Pabien Kòrsou, MFK ta sigui traha pa un Kòrsou Sano, Salu i Sigur.

 

Jacinta Constancia

Parlamentario pa

Frakshon di MFK