LASONAN FAMILIAR TA BENEFISIÁ E RELASHON ENTRE KÒRSOU KU LA GUAJIRA/ COLOMBIA.

LASONAN FAMILIAR TA BENEFISIÁ E RELASHON ENTRE KÒRSOU KU LA GUAJIRA/ COLOMBIA.

Bishita i presensia di minister di Turismo i Desaroyo Ekonómiko señora Giselle Mac William na La Guajira, suidat-kapital Riohacha a duna un empuhe fuerte na esfuersonan di organisashonnan komersial kurasoleño pa establesé kontaktonan firme i konfiabel ku  komersiantenan kolombiano. Hasimentu di negoshi riba tereno agrario, kultivo di bestia ku lo resultá den importashon di fruta i berdura, karni etcetera, pero ta rekerí invershon di konfiansa i disponibilidat pa krea aliansa. Kòrsou en prinsipio no ta fuerte den esei komo ku nos ya pa siglo tin nos bista kasi kompletamente dirigí riba Europa, prinsipalmente Ulanda. Pero ei mes Kòrsou a probechá enormemente di Venezuela ku presensia di e refineria i refinamentu di petroli. Ku turistanan for di Venezuela tambe Kòrsou su ekonomia a konosé momentonan di gloria i progreso. Pero pa gran parti nos relashonnan ku Venezuela a sostené riba e papel interesante ku Pedro Luis Brion i Carlos Manuel Piar a desplegá komo aliadonan di Simón Bolívar den su lucha pa liberá Gran Colombia. Ounke den pasado a yega di tin problemanan di karakter polítiko,Venezuela por lo general a atendé Kòrsou ku sierto privilegio. Entre tantu e situashon entre Venezuela i e islanan Aruba, Boneiru i Kòrsou, no ta asina positivo mas, komo tal Venezuela hasta a sera frontera pa nos i ta parse ku por lo pronto e relashonnan no ta bai drecha tampoko. Enfin, sea nos ta parti di Reino Ulandes òf nò, Kòrsou ta sintá ku e realidat ku e teritorio aki ta ubika den Karibe, anto esei ta rekerí ku mester sa kon ta atendé ku nos bisiñanan. Ántes tabatin flèktumentu di sombré i hasimentu di negoshi ku Panamá. Baimentu di Cuba pa  traha den e negoshi di suku a atraé un fluho grandi di obreronan kurasoleño pa bai hasi e tipo di trabounan ei den produkshon i kosecha di kaña. Ku establesementu di e refineria aki na Kòrsou, obreronan di kasi tur e islanan di Karibe i tambe Sürnam, Venezuela i Madeira a haña trabou aki. Añanan despues a sosodé ku for di Santo Domingo, Haiti, Colombia, Jamaica sentenáres di obrero a bin aki pa buska un mihó bida. Ku e sirkunstansia polítiko i gubernamental instabil den Venezuela, venezolanonan ta saliendo na gran kantidat for di nan pais natal pa establesé den eksterior. Kòrsou tambe ta konfrontá ku e konsekuensianan di e problemanan na Venezuela, pasobra aki tambe indokumentadónan ta subi tera, hasiendo uzo di lanchanan anto hopi biaha ku armanan di kandela i droga na bordo. Tur e detayenan menshoná ta demostrá ku sea pasivo of nò Kòrsou ta hañ’é ku e konsekuensianan di ta situá den Karibe. Pero preferiblemente laga nos mes asumí un papel aktivo anto! Un grupo di komersiante kurasoleño despues di e situashon problemátiko ku a surgi na Venezuela, ta hasiendo e trámitenan nesesario pa yega na areglo ku empresanan kolombiano den e dependensia La Guajira (provinsia) ku su kapital Riohacha. Prinsipalmente e tema di nesesidat di fruta i berdura ta loke mas a haña atenshon te asina leu. Pero ku tur esaki outomátikamente e konekshon marítimo a bira un tema di sumo importansia pa traha riba dje. Naturalmente otro nesesidatnan tambe a surgi. Kòrsou en kambio tin servisionan balioso di ofresé riba tereno di turismo, desaroyo di infrastruktura, mantenshon di playanan ku sigur pa La Guajira mester papia di áreanan grandi práktikamente intakto. Ku e bishita di minister di Turismo i Desaroyo Ekonómiko señora Giselle Mac William, kende tumando su tempu nesesario, a demostrá interes pa sinta ku tur esnan konserní na mesa, anto ku e aktitut aki naturalmente portanan a habri den un área kaminda yunan di Kòrsou ya for di siglonan pasá tabata frekuentá. E lasonan familiar entre Kòrsou ku La Guajira ta un faktor bastante emoshonal i ta fasilitá tur aserkamentu awor i den futuro. Pero, no mester laga heru kayente fria!     

  

This site uses Akismet to reduce spam. Learn how your comment data is processed.

error: Content is protected !!
%d bloggers like this: