AWOR KU NEGOSASHON TA DRENTA FASE KULMINTANTE MAS AUN MESTER DI TRANKILIDAT I KEDA FIHA RIBA E META
AWOR KU NEGOSASHON TA DRENTA FASE KULMINTANTE MAS AUN MESTER DI TRANKILIDAT I KEDA FIHA RIBA E META
Willemstad 25 di Novèmber 2019- E negosiashonnan pa yega na un manehadó i operadó pa nos refineria a drenta un fase kulminante i krítiko. Ta komprendibel ku tin hopi espektativa pa e resultado di e esfuerso mayó aki, sigur awor ku no falta muchu pa e aktual kontrakt ku PDVSA terminá. No opstante ku nos tur por tin nos opinion nos meta komun mester ta pa yega na un konklushon eksitoso, ku ta garantisá un futuro duradero di nos refineria. Ta pa e motibu aki Refineria di Kòrsou (RdK) ke enfatisá su petishon na komunidat kompletu pa aun mas mantené e trankilidat i komprondé ku ta benefisiá kolektividat pa atendé e asuntu aki ku e seriedat nesesario. Sa ku e Project Management Organization (PMO) di Refineria di Kòrsou ta trahando dia i anochi hibando e negosiashonnan.
E trayekto ku a keda inisiá pa e PMO, instalá na Febrüari último, a kana konforme planifikashon.
Tal manera a proyektá pa fin di e luna aki ta premirá di por yega na un konklushon. Den tipo di negosiashon asina aki ta normal ku bo no por duna detaye di e negosiashonnan, miéntras e negosiashon ta andando, debí ku bo ta mará na akuerdonan di sekresia, esta e asina yama non-disclosure agreements. Parti di e esfuersonan aki tabata tambe un trabou di skrutinahe profundo,dor di PMO i di e partido ku ta negoshá kuné. Meskos ta konta ku e partido na su turno ta hasi un investigashon profundo di nos fasilidatnan petrolero. Ámbos a i ta tuma lugá den a kaso aki. Kualke paso ku lo por sigui, unabes konkluí e negosiashonnan, ta dependiente di e resultado di e negosiashon ku aworakí ta wòrdu hibá. RdK ta komprometé pa duna informashon asina esaki ta posibel.
CRU bèk den operashon
Curaçao Refinery Utilities (CRU) despues di sufri un desperfekto di su GT9, djabièrnè último, a restablesé suministro na Refineria di Kòrsou djadumingu mardugá. RdK huntu ku gerensia i personal di CRU ta hasiendo lo máksimo pa garantisá a stabilidat di e planta i produkshon duradero di utilidat afin ku refineria por kontinuá ku su operashon.