E periodo entre petishon i entrega di un karta di Bon Kondukta ta dura demasiado largu pa wòrdu entrega

Na Minister di Hustisia

Señor Quincy Girigorie

PRESENTE

 

Willemstad, 25 di novèmber 2019

Tópiko: E periodo entre petishon i entrega di un karta di Bon Kondukta ta dura demasiado largu pa wòrdu entrega

 

Honorabel Minister Girigorie,                                                                                                                 

 

Frakshon di MFK a wòrdu aserka pa diferente siudadano ku e reklamo ku ta tuma hopi tempu, tin biaha lunanan largu pa un petishon pa un karta di Bon Kondukta wòrdu entrega.

 

Na e servisio di bentana di informashon no tur biaha por duna e persona ku a hasi un petishon un splikashon ta dikon e proseso ta tarda asina tantu, debí ku ta na e departamentonan di hustisia e petishon aki ta wòrdu atendé.

 

Ultimo tempu tin hopi instansia/empresa ku ta eksigí pa e siudadano presentá un karta di Bon Kondukta, pa asina e siudadano por haña sierto aprobashon di e instansia/empresa. Tin vários skol na Kòrsou ku ora alumnonan bai inskribí, ta pidi nan pa trese un karta di Bon Kondukta i mayoria di biaha e karta aki no ta keda kla na tempu.

 

Yunan di Kòrsou ku ta biba den eksterior tambe ta wòrdu perhudiká, esaki na momentu ku nan mester renobá nan pèrmit di residensia of pa un trabou na e pais kamindanan ta biba, esaki debí ku e karta di Bon Kondukta ku nan tin mester pa hasi e renobashon di nan pèrmit of pa trabou ku nan por haña no ta keda kla na tempu.

 

Pa suskrito miembro di Parlamento pa MFK, ta inkomprendibel kon den e tempu moderno ku nos ta biba aden, mester tuma asina tantu tempu pa por entrega un karta di Bon Kondukta.

  

Frakshon di MFK a base di e preokupashon di siudadanonan, ta aserká Minister di Hustisia pa medio di artíkulo 96 di Reglamentu di Orden, ku siguiente preguntanan;

 

  1. Minister ta na altura ku e tempu entre registrashon i entrega di un petishon pa un karta di bon kondukta ta dura algun luna promé ku esaki wòrdu entrega?

 

  1. Minister por informá Parlamento, kon e proseso pa atendé un petishon pa un karta di bon kondukta ta tuma lugá?

 

  1. E proseso aki ta un proseso outomatisá òf esaki ta tuma lugá di forma tradishonal i/òf manual?

 

  1. Minister a tende kaba di e reklamonan ku tin riba durashon di e proseso aki?

 

  1. Si Minister a tende kaba òf si Minister no a tende ainda, kon Minister tin pensa pa atendé ku e problema aki pa e durashon i proseso di entrega di un karta di Bon Kondukta por ta mas kòrtiku?

 

  1. Minister ta haña ku ta responsabel pa un siudadano tin ku warda asina tantu tempu pa e por haña un karta di bon kondukta?

Frakshon di MFK ta spera ku Minister Girigorie ta tuma bon nota di e di e karta aki i ku minister ta kontestá e preguntanan den e tempu stipulá konforme e protokòl firma entre gobièrnu i Parlamento di Kòrsou.

 

Atentamente,

 

___________________

Juniël Carolina

Miembro di Parlamento

Frakshon di MFK

 

Na: Vise-Presidente di Parlamento di Kòrsou

Señor E. Cleopa

Wilhelminaplein # 4

PRESENTE

 

Kòrsou, 25 di novèmber 2019

 

Apresiabel Señor Cleopa, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na Minister Quincy Girigorie enkargá ku Hustisia, ku preguntanan ku mi persona ta hasi na e minister konserní.

 

Danki pa e koperashon.

 

Atentamente,

 

___________________                 

Juniël Carolina

Miembro di Parlamento

Frakshon di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: