Lions Club a start Bon Bisiña 2019

Lions Club a start Bon Bisiña 2019

Nos a drenta fin di aña, e temporada ku mayoria hende ta kuminsá pensa ku nan ta bai disfrutá ku famia den dushi ambiente kome i bebe. E temporada aki ta unu ku e famia di Lions klup ta kòrda riba esnan ku no tin i ta den e kuadro aki ku pa di 54 aña konsekutivo Curaçao Lions Club ta organisá e akshon Bon Bisiña kaminda ta hasi kolekta na skolnan i na supermerkado pa asina por traha pakete ku por duna na esnan ménos pudiente. 

Den e akshon aki Lions ta uni forsa ku skolnan pasobra e meta original ta pa konsientisá nos mucha i hóbennan di e importansia di kompartí ku bo próhimo. Ya kaba miembronan di Lions a bishita e diferente skolnan pues mayornan lo tende di nan muchanan ku den e temporada aki ta bon pa duna. Danki na maestronan pa nan sosten total den esaki. Ta bon pa para ketu i yama danki tambe na e tremendo koperashon di nos empresanan lokal ku tambe ta yuda pa asina Lions por yuda mas famia den nesesidat.

E aña aki miembronan di Lions huntu ku voluntarionan lo ta pará na supermerkado Van den Tweel na Zeelandia unda klientenan por hasi kompra speshal pa hasi donashon na Lions. E supermerkado a pone algun bon produkto na preis speshal di manera ku klientenan por kumpra i hasi donashon na Lions. Produktonan manera suku, hariña di funchi, corned beef, soseishi di bleki òf na bòter, buskuchi dushi aros, spam, berdura na bleki òf na bòter tur ta bon bini.

Dianan 6, 7 i 8 di desèmber 2019 miembronan di Lions Club lo ta na supermerkado Van den Tweel na Zeelandia for di mainta te atardi pa risibí e donashon di tur esnan di bon boluntat.

Bo yudansa ta trese felisidat riba kara di esnan realmente den nesesidat. 

 

Curaçao, 4 di desèmber 2019

 

Riba potrèt: Lions ta duna charla na muchanan na skol tokante importansia di kompartí ku esnan ku mas mester di dje den nos komunidat. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: