DISCURSO MINISTER XIOMARA MADURO NA E TRIBUTO POSTUMO CULTURAL PA JUAN CHABAYA LAMPE ‘PADU’ (Q.E.P.D.) : NOS MESTER PERCURA PA NOS YIUNAN Y NAN YIUNAN SEMPER SIñA KENDE TABATA ‘PADU DEL CARIBE’.

December 10, 2019 REDAKSHON

DISCURSO MINISTER XIOMARA MADURO NA E TRIBUTO POSTUMO CULTURAL PA JUAN CHABAYA LAMPE ‘PADU’ (Q.E.P.D.) :

NOS MESTER PERCURA PA NOS YIUNAN Y NAN YIUNAN SEMPER SIñA KENDE TABATA ‘PADU DEL CARIBE’.

ORANJESTAD: Durante e tributo posthumo na Juan Chabaya ‘Padu’ Lampe (q.e.p.d) Minister Xiomara Maduro inicia su discurso cu: Ken por a pensa cu awe nos ta para riba Plaza Padu pa nos tuma despedida oficial di nos ‘Tata di Cultura di Aruba’? Ta hopi di nos, di un forma of otro ya tabata pensando caba, ta con nos lo bay celebra e di 100 aniversario di Padu Lampe otro aña na april. Esey no ta kita afo cu alabes nos tabata teme pa Padu su salud, ya cu nos por a mira tambe con poco poco e curpa di Padu tabata bay atras. Nos por a tuma nota tambe, cu maske e curpa tabata bay atras, e deseo y motivacion di Padu pa participa na un actividad cultural tabata keda mes grandi.

E mandatario a bisa cu e trayectoria di Padu ta hopi largo y e ta conoci tambe caba pa mayoria hende. Ta p’esey na e momento aki e lo no bay elabora tanto riba esey y lo pone mas tanto enfasis riba e ser humano cu Padu tabata na e mundo aki.

Padu tabata un artista Arubiano masha respeta y reconoci tanto riba su mesun isla, como pafo di Aruba. Ta masha poco yiu di tera nos tin cu a destaca riba diferente tereno artistico, tanto na nivel regional como pafo di Caribe. Ta pa e motibo aki tambe Padu a haya e apodo di ‘Padu del Caribe’.

Padu tabata un persona sumamente inteligente cu un don multi-facetico. Ta poco biaha bo ta haya un hende cu por toca mas di un instrumento musical, canta, compone, pinta y scirbi alabes. Particularmente e letranan di su canticanan tabatin un nificacion profundo. Tabata un alegria pa mira con Padu tabata disfruta di mira un artista interpreta un cancion di dje, expresando tur e sentimentonan cu Padu mes a hinca den e piesa.

E dignatario a enfatisa como Minister di Cultura, pero tambe durante cu e tabata Parlamentario, e tabatin e honor y placer di a topa hopi biaha cu Padu, na varios actividad cultural. Na tur ocasion, el a experiencia cuPadu tabatin un sonrisa riba su cara. Tur hende sin duda, por a observa cu Padu tabata sintie orguyoso di ta ‘Tata di Cultura di Aruba’.

Nos cu a conoce Padu di cerca sa, cu Padu tabata un hende sumamente alegre y humilde. E tabata trata tur hende y tur artista cu e mesun respet, amor y cariño. Padu no tabata haci distincion den su forma di trata hende. Na su propio manera e tabata corda cada persona pa medio di duna nan un nomber special. Asina por ehempel si el a mira un persona bisti na payaso, e ta yama e persona

aki ‘e clown’. Esey tabata su forma di indica un persona, pa motibo cu e no ta corda tur e nombernan.

Cada persona cu topa cu Padu, ora di bay yama Padu ayo, semper Padu como ‘un bon tata’ tabata duna tur ‘su yiunan’ su bendicion. Minister di Cultura a subraya, cu ta nos tur lo bay haya falta di Padu su palabranan cu ta zona manera un melodia den nos orea: “Dios bendiciona bo.”

E mandatario ta sumamente contento cu Padu na varios ocasion por a experiencia e aprecio cu hopi hende, tanto na Aruba como na otro paisnan, tabatin p’e pa tur e trabounan significante cu el a haci riba tereno di arte y cultura. Minister Xiomara Maduro ta sumamente orguyoso di por bisa awe, cu su persona tambe ta forma parti di historia di bida di Padu, como Minister di Cultura cu a dun’e su ultimo honor oficial na bida, ora cu e aña aki, e mandatario a entrega Padu e prome ehemplar di e buki ‘BaluArte’. Un documentacion di nos ‘Pilarnan Cultural’. Y Padu sigur ta un di nos pilarnan cultural.

Padu su presencia na actividadnan cultural, ta demostra e consciencia di Padu mes na prome luga, pero sigur di su yiu muhe Vivian tambe, di e balor cu nan tabata duna na e nombramento di Padu como “E Tata di Cultura di Aruba”. E mandatario a subraya cu e tin sigur cu tanto Padu como Vivian ta reconoce y sinti e aprecio y stimacion cu e pueblo di Aruba tin pa Padu. Minister di Cultura a yama Vivian y Victor “masha masha danki” pa tur e biahanan cu nan a percura pa Padu asisti na un evento cultural. E mandatario a bisa cu “Danki na boso ayudo y sosten, Padu por a cumpli cu su funcion como nos ‘Tata di Cultura’, te den e ultimo dianan di su bida”.

Minister Xiomara Maduro a haci un yamada na henter pueblo di Aruba, pa por fabor percura pa nos yiunan y nan yiunan semper siña kende tabata ‘Padu del Caribe’. Nos futuro generacion semper mester sa kendenan ta e compositornan di nos himno nacional y nan mester ta na altura di kende tabata nos ‘Tata di Cultura di Aruba’, e mandatario a enfatisa.

Pa e persona cu Padu tabata; pa tur loke cu Padu a nifica pa cada un di nos; pero muy en especial pa e persona cu Padu tabata pa henter pueblo di Aruba, na nomber di Gobierno di Aruba y henter pueblo di Aruba Minister di Cultura a yama nos ‘Tata di Cultura’: “Padu masha masha danki. Nos lo keda corda bo pa e persona amical y positivo cu bo tabata.” E mandatario a desea Padu (q.e.p.d.) su yiu muhe Vivian, su suegro Victor, su nieto Ervin, su nieta Sonia y demas famia, hopi forza den e dianan cu ta sigui, special den e dianan di Pasco y Fin di Aña. Sa cu den nos mente y nos curason Padu lo ta bibo pa semper. “Padu sosega na paz den Reino di Señor.”