Tur persona ku tin un pèrmit pa transporte hende kontra pago tin ku tene nan mes na regla
Tur persona ku tin un pèrmit pa transporte hende kontra pago tin ku tene nan mes na regla
Willemstad – Tur persona ku tin un pèrmit pa transporte hende kontra pago tin ku tene nan mes na e reglanan stipulá den nan pèrmit. Ministerio di Tráfiko, Transporte i Planifikashon Urbano (VVRP) a tuma nota resientemente di personanan ku no ta tene nan mes na regla. Ta hasi uso di shofùr ouksiliar siendo ku e shofùr mes ta den ful kapasidat pa por transportá hende, i a nota ku ta kompartí plachi di number ku mas vehíkulo. Esaki no por i VVRP ta urgí tur hende pa mantené nan mes na regla. Si topa hendenan ku ta violá e lei eksistente lo tuma pasonan severo kontra di nan, i mester tene kuenta ku tur e konsekuenshanan ku esaki ta trese kuné.
Un persona ku tin un pèrmit pa transportá hende kontra pago mes tin ku transportá pasahero den e vehíkulo asigná pa hasi esaki. E vehíkulo aki mester tin su plachi di number asigná segun e pèrmit, dilanti i patras buta na su vehikulo. Esaki ta segun nos leinan di tráfiko i di “motorrijtuigenbelasting”. Si esaki no ta e kaso, e persona por haña un but pa mal uso di plachi di number, i ta kore rísiko ku ta revoká su pèrmit. No por tin dos vehíkulo ta kore mesun plachi di number. Otro punto ta ku shofùrnan ta kore e vehíkulo sin ku ta hasi uso di e plachinan di number ku korekto.
Banda di esaki, e persona ku tin e pèrmit, no por uso shofùr ouksiliar (‘hulpbestuurder’) si e mes por transportá hende. Den kasonan eksepshonal (por ehèmpel malesa), por hasi uso di un shofùr ouksiliar. No ta e intenshon pa esun ku tin e pèrmit ta usa e shofùr ouksiliar manera un trahadó di dje. Si e persona ku tin e pèrmit tin kapasidat di manehá e vehíkulo, e mes mester hasi esaki.
Esnan ku ta kometé infrakshon kontra di e lei di transporte i/òf e pèrmit, ta kore e rísiko ku sea ta suspendé òf revoká su pèrmit. E komportashon aki no ta aseptabel. Si mester opservá un kontinuashon di e komportashonnan ariba menshoná, lo usa e instrumentonan nesesario pa suspendé i/òf revoká e pèrmitnan.
