Ultimo edishon di Ban Vèlt Bèk 2019!

Brievengat- Djasabra 21 di desèmber 2019 lo ta e ultimo edishon di e projekto ‘Ban Vèlt Bèk’ organisá dor di Coachnan Danaë Daal i Verda Betrian. E projekto ku a kuminsa na yanüari na vèlt di Barber lo finalisá na vèlt di Stadion Ergilio Hato na Brievengat. E meta di e projekto ta pa laga e damitanan hasi deporte i tambe interesá nan pa djòin un tim di futbòl. ‘Nos ta kontentu komo coachnan feminino nos por a trese un kambio pa komunidat i tambe e damitanan. Asina nan tambe ta sinti nan mes, komo hende muhé, representá riba vèlt i den komunidat’ Daal i Betrian ta komentá.

Den kuadro di representashon, ‘Ban Vèlt Bèk’ ta bai kolaborá dia 21 di desèmber ku e projekto ‘Favela Street Kòrsou’ organisá dor di Rocky Hehakaija. E dos projektonan ku e enfoke riba komunidat i deporte, a sera kabes pa forma un programa ku ta trese tur damas futbolísta huntu. Mane ta kustumber for di 8or di mainta e programa di Ban Vèlt Bèk lo start pa mucha muhénan di edat 6 pa 12 aña, sigí for di 9or di mainta ku e klínika di futbòl di e coachnan di Favela Street. Asina ta klousura e edishon di Ban Vèlt Bèk na un manera festivo i alkansa e meta pa trese tur damasnan huntu den un esfera deportivo.

Coach Danaë i Verda ta invitá partisipante nobo nan i esnan ku a yega di partisipá kaba ku ke eksperensiá e Ban Vèlt Bèk aki. E aktividat lo ta gratis i por registrá via facebook page: Curaçao Women’s Football, email: bvbkorsou@gmail.com of number di telefòn: 5600079.