Aplouso pa ‘FKP den bo Bario’

 

Título

Aplouso pa ‘FKP den bo Bario’

 

Ku satisfakshon Partido PIN a tuma nota di FKP su kampaña pa tur siman bishitá un of otro bario kaminda tin kasnan di pueblo. E kampaña aki, yamá ‘FKP den bo BARIO’, ta un ehèmpel kon un organisashon di gobièrnu por demonstrá su abilidat pa skucha i drecha.

 

Partido Inovashon Nashonal (PIN) den kuminsamentu di novèmber a bishitá barionan i a konfirmá atrobe ku tin un nesesidat grandi serka pueblo pa haña atenshon i mihó servisio di FKP. Nos a registrá muchu situashon di kas ku mester mantenshon lihé, di kas pará bashí ku ta bai pèrdí, i di falta di kombibensha entre bisiñanan. Ademas un gritu di habitantenan pa por kumpra e kasnan.

 

Den un komunikado di dia 8 di novèmber PIN a trese e preokupashonnan reinante dilanti. Pesei nos ta kontentu ku FKP a reakshoná ku su kampaña ‘FKP den bo Bario’. Ku e kampaña di FKP, pueblo tin chèns di trese nan malkontentu dilanti i FKP ta haña mihó bista riba e problemanan, pa por atendé ku nan.

PIN a komprendé ku a bishitá 4 bario i ku e enkuentro na Koraalspecht tabata e último pa awor aki. Nos ta spera ku FKP lo drenta den más bario pa asina atendé e hende manera debe ser. Den e sentido aki nos ta konta ku FKP i su ekipo lo keda duna oído na tur loke ta na bienestar di e pueblo.

 

Partido PIN ta súper kontentu ku FKP su esfuerso pa skucha i ta deseá FKP éksito ku su kampaña ‘FKP den bo Bario’. Esaki ta un simia chikí ku por bira un logro grandi pa pueblo di Kòrsou.

 

PIN lo vigilá si e bishitanan di FKP den bario ta kondusí na drecha e kasnan, habitá esnan bashi, drecha konbibensia i atendé e deseo di kompra di e kasnan dor di habitantenan.

 

This site uses Akismet to reduce spam. Learn how your comment data is processed.

%d bloggers like this: