Kulminashon di kompetensia interno di waterpolo organisa pa Swim Club Orca Curaçao.

Kulminashon di kompetensia interno di waterpolo organisa pa Swim Club Orca Curaçao.

 

 

Dia 11 di desèmber último, Orca tabatin kulminashon di nan kompetensia di waterpolo ku a kuminsá for di djasabra 27 di novèmber 2021. 68 waterpolista hóben, mucha hòmber i mucha muhé i adulto tabata aktivo durante di e dianan di kompetensia ku ta tras di lomba. Tur aña tin kompetensia lokal di waterpolo, debí ku ta Orca ta e úniko ekipo na Kòrsou ku ta práktika e deporte di waterpolo, ta parti e kategorianan den dos òf tres ekipo balansa i pareu pa nan kompetí kontra di otro. Ta trata di e kategorianan U14, U17 i U19 & señor. Den e kategoria di U14 i U19 & señor a hunga un seri mihó di sinku (5) wega i e kategoria di U17 a hunga e sistema di Round Robbin, semi final i final.

 

E weganan a tuma lugá na Pisina Bennie Leito i na Pirate Bay, Piscadera, dilanti di e pir di Carmabi. E timnan ku a gana e seri mihó di sinku (5) wega den nan kategoria a risibí medaya di oro i tur Atleta di e otro tim risibí medaya di plata. E atletanan di U17 a risibí medaya di Oro, plata i brons respektivamente.

 

Direktiva di Orca ta manda un palabra di gradisimentu na gerensia di Carmabi i Pirate Bay pa a laga e weganan tuma lugá na e sitio.

 

Kisas bo yu, nietu, subrino, amigu/amiga su yu òf bisiňa ta gusta landa pero no tin un deporte den mente ainda pa hasi, motive òf trese pa wak si e ta gusta waterpolo i ken sa.

Por tuma kontakto na tel: 529 6586 ku Vernon Toré pa mas informashon.

 

Skibí pa,

 

Vernon Toré

Presidente di Orca,