INVITASHON NA PUEBLO DI KORSOU PA BAN MANIFESTA PASIFIKAMENTE DJALUNA AWOR FOR 30 di DESEMBER PA 9or DI MAINTA NA PARKE WILHELMINA

INVITASHON NA PUEBLO DI KORSOU PA BAN MANIFESTA 

PASIFIKAMENTE DJALUNA AWOR FOR 30 di DESEMBER PA 9or DI MAINTA NA PARKE WILHELMINA

 

Djaluna awor 30 di desèmber 2019, lo tin un reunion di Parlamento pa trata e manera bulgar i sin eskrupulo ku Gabinete Rhuggenaath por medio di RDK a regalá Grupo Klesh Refineria Isla, terminal di Bullenbaai i CRU pa un montante di  1 dòler.

 

Pueblo a manda gobièrnu di Kòrsou pa bai buska un partner stratégiko pa operá nos refineria i no a duna enkargo pa regalá nos propiedat na un grupo ekstranhero. 

 

Pa medio di e komunikado aki nos ke invitá pueblo di Kòrsou kompletu pa bini masalmente na Parke Wilhelmina (ALAMEDA), djaluna próksimo, dia 30 di desèmber for di 9or di mainta bai ariba. Nos mester manda un señal kla i raspá pa gabinete Rhuggenaath ku e lokual ku nan a logra no ta akseptabel pa pueblo.

 

E manifestashon aki lo ta pasífiko i e metanan ku nos kier logra ta;

 

  • Si bo kier bende propiedatnan di e pueblo, e no por bai na un preis di baratio i sigur no pòrnada. Tin rapòrtnan den pasado ku ta indiká bon kla ku e terminal di Bullenbaai ta bal mas o ménos mil (1000) mion dòler, e Refineria ta bal mas o ménos 350 mion dòler i CRU ta bal mas o ménos 68 mion dòler. Pues total pueblo tin un propiedat ku SHELL a laga pa nos na 1985 di kasi 1.400.000.000 dòler. Esaki sin konta e balor stratégiko i sin konta e balor di e “erfpacht” kual ta un “prime location”. Nada ménos no ta akseptabel i e pago awó awó, nada kuenta di den futuro.

 

  • Si gobièrnu kier kambia di buskamentu di partner stratégiko i bai over na benta di propiedat di pueblo, mester habri un bid kompletamente di nobo pa duna un “FAIR” chèns na tur interesado. Nos ta na altura ku tin otro interesado tambe ku kier partisipá den un posibel kompra. Pues nos ta atvertí pa duna tur interesado un “FAIR” chèns pa partisipá den e proseso di benta.

 

  • Tambe mester garantisá kuponan di trabou pa e trahadónan di Refineria Isla pa hinter aña 2020 bai ariba. Pues mester pone gobièrnu komprondé ku e mester sinta na mesa ku PDVSA i yega na un akuerdo pa nada ménos ku un aña pa PDVSA por sigui operá nos Refineria.

 

  • Tur dokumento mester ta na disposishon di pueblo, no por skonde nada pa nos pueblo bou di e kapa di NON-DISCLOSURE.

 

Ta awor òf nunka;

 

P’esei nos ta spera hinter pueblo di Kòrsou djaluna awor 30 di desèmber for di 9or di mainta bai ariba.

 

Un yamada ta bai na doñonan di trabou pa duna nan trahadónan maske ta dos ora liber pa nan por asistí na e manifestashon pasikiko aki.

 

Pa esunnan ku no por duna liber, nos ta invitá boso pa den boso ora liber mèrdia basha bini Punda tòch.

 

Pa e penshonado ku ta kobra djaluna awor, kaba di kobra i bini trankil bin duna bo sosten un ratu na e manifestashon aki.

 

Abo ama di kas ku mester keda kas kuida bo sernan kerí, nos ta pidi bo pa djaluna awor dia 30 di desèmber nèt nèt 12or di mèrdia bati bo kuchara riba bo panchi den tur skina na Kòrsou pa demonstrá bo mal kontentu.

 

Meskos ta bai un yamamentu djaluna awor dia 30 di desèmber na tur outomobilista pa sende bo lusnan nèt nèt 12or di mèrdia pa 5 minüt so i kuminda otro ku un pitu.

 

Por parker na Waaigaat  i den Otrobanda, banda di stadion di Rif i kana bini Alameda.

 

Sigui òrdu di outoridat na tur momento, pero no laga nan deskurashá bo pa bo no yega Alameda.

 

Atentamente,

 

Charles Cooper,

Gilbert Doran,

Gilmar “Pik” Pisas

Meindert “Menki” Rojer

Jaime Cordoba

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: