MINISTER DI CULTURA TA EXTENDE UN INVITACION CORDIAL NA TUR ESNAN CU TA STIMA ARUBA MA NO A NACE AKI NAN

MINISTER DI CULTURA TA EXTENDE UN INVITACION CORDIAL NA TUR ESNAN CU TA STIMA ARUBA MA NO A NACE AKI NAN

 

Pa asisti na e Manisfestacion Cultural y Ceremonia Protocolar dia 24 y 25 di januari 2020

 

Oranjestad – Minister di Cultura  a extende un invitacion cordial na tur esnan cu a bin biba na Pais Aruba, cu a haci Aruba nan hogar, ta labora y ta contribui na desaroyo di Pais Aruba, pa asisti na e Manisfestacion Cultural y Ceremonia Protocolar en conexion cu celebracion di fecha natalicio di Libertador Gilberto François Betico Croes.

 

E mandatario a enfatisa cu Betico a siña nos tambe cu un Arubiano ta esun cu tin amor pa Aruba y cu Aruba ta den su mente y curason. E dignatario ta extende un invitacion na  tur esnan cu ta biba na Aruba y no a nace na Aruba pero ta stima Aruba pa asisti na e Manisfestacion Cultural diabierna dia 24 di januari pa 7’or di anochi te 10.30 di anochi na Plaza Libertador G.F. Betico Croes, durante cual lo tin un bunita concierto di Grupo di Betico. Durante e anochi aki tambe lo tin un feria culinario di Aruba y benta di productonan artesanal.

 

Betico su legado y su enseñansa te awe a keda presente. Ta importante pa tur cuidadano di Aruba conoce nos historia, cu ta Danki na Libertador Betico Croes Aruba a logra su Status Aparte den Reino Hulandes. Ta danki na su sacrificionan cu a awe nos ta un Pais cu por habri brasa pa tur esnan cu bon boluntad cu kier haci Aruba nan hogar y contribui na progreso di Aruba.

 

E mandatario a extende un invitacion cordial na tur esnan cu ta stima Aruba ma no a nace akinan,  pa ta presente tambe riba e fecha natalicio di Libertador Betico Croes diasabra dia 25 di januari pa 9or di mainta te 11’or di mainta pa presencia e Ceremonia Protocolar. E Minister di Cultura a subraya pa ban bin hunto y asina gradici cu Danki na Dje – Nos Libertador Gilberto François Betico Croes – awe nos tin Pais Aruba y pa hunto nos sigui contribui na progreso di Pais Aruba.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: