Siguridat na Haf di Piskadó Kura Buriku

Willemstad, 23 di yanüari 2020

 

Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Señor Millerson,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di GMN, señora S. Camelia-Römer.

 

Danki pa e koperashon.

 

Atentamente,

 

Juniël Carolina

Miembro di Parlamento

pa frakshon di MFK

 

Minister di GMN

Señora S. Camelia-Römer
PRESENTE

Kòrsou, 23 di yanüari 2020

Tópiko: Siguridat na Haf di Piskadó Kura Buriku

Señora Minister Camelia-Römer,

Pa medio di esaki suskrito Juniël Carolina, miembro di Parlamento di Kòrsou pa frakshon di MFK ta aserka bo persona komo minister enkargá ku Salu, Medio Ambiente i Naturalesa (GMN) ku e siguiente preguntanan pa loke ta trata siguridat i e situashon di fasilidatnan na haf di piskadó na Kura Buriku. 

 

Durante un bishita riba invitashon di algun piskadó na e haf di piskadó na Kura Buriku, mi persona a wòrdu pone na altura ku entre otro pa un lus di kaya ku pa basta aña no ta funshoná, tin hopi vandalismo i ladronisia na boto i propiedatnan di e piskadónan na e haf ya menshoná.

 

Tambe por a tuma nota ku un pir ku ta destiná pa mara 24 boto tin 34 boto mara na esaki, kiermen tin 11 boto di mas, e situashon aki ta hasi ku e botonan ta hasi daño na otro, piskadónan ta pidi pa un ampliashon di pir pa por mara mas boto.

 

E dòk ku ta saka boto di piskadó for di laman, pa e botonan por wòrdu mantené ta hopi deteriorá i ta pidi atenshon pa esaki por haña e mantenshon nesesario.

 

No tin bari, pa por benta shushi aden i tur shushi ta wòrdu destiná den un boto kantu di e haf di piskadó.  

 

E karetera di tera ku ta kondusí pa bai na e haf di piskadó, meresé un tiki awa di breu òf asfalt.

 

Riba e ruta ku ta kondusí pa bai na e haf di piskadó tin diferente sitio ku ta wòrdu usa pa dùmp sushi di forma ilegal.

 

Mester halsa seguridat na e haf aki i tambe kombatí drumimentu di shushi ilegal.

 

Hasiendo uso di artíkulo 96 di reglamentu di órden mi persona komo miembro di Parlamento pa frakshon di MFK, ta aserka señora Minister Camelia-Romer na nòmber di e piskadónan ku e siguiente preguntanan;

 

1. Señora Minister ta na altura di e situashon na haf di piskadó na Kura Buriku?

 

1. Ki dia ta e último biaha ku señora Minister a bishita e haf di piskadó na Kura Buriku?

 

1. Ki dia Señora Minister por laga instalá un lus di kaya na e haf di piskadó, pa asina halsa e seguridat den oranan di anochi i mardugá na e haf aki?

 

1. Ki dia señora Minister ta amplia e pir pa mara botonan di piskadó i tambe duna atenshon na mantenshon di e dòk na haf di piskadó Kura Buriku? 

 

1. Minister por splika, kon ta ku e kontròlnan kontra dumpmento di shushi na sitionan ilegal i ki dia ta laga ubika barínan di shushi pa tira shushi aden na e haf di piskadó? 

 

1. Señora Minister por regla ku pa den anja 2020 si e karetera di tera ku ta kondusí pa e haf di piskadó por wòrdu asfaltá òf sikiera un tiki awa di breuw? 

 

1. Señora minister por informá Parlamento ken ta doño di e edifisionan na e haf aki i ki plan tin relashoná ku desaroyo di e haf di piskadó Kura Buriku?

 

1. Señora minister por informá Parlamento konta ku e seguridat i fasilidatnan na e otro hafnan di piskadó na Kòrsou?  

 

Nos ta spera un kontesta mas pronto posibel di parti di Minister debí ku manera ya menshoná e situashon aki ta preokupá e piskadonan ku ta hasi uso di e haf aki i nan mester di dje den bon kondishon.

 

Atentamente,

Juniël Carolina

Miembro di Parlamento

pa frakshon di MFK